जलसंधारणासाठी ५ सदस्यीय समन्वय समिती स्थापन करणार; मार्लेश्वर पायथ्याशी ३० ऑक्टोबरला बंधारा बांधण्याचे नियोजन
देवरुख : Devrukh Saptalingi River Conference संदर्भात सप्तलिंगी नदीचे पुनरुज्जीवन आणि आगामी संभाव्य दुष्काळावर मात करण्याच्या उद्देशाने आयोजित ‘तिसरी सप्तलिंगी नदी परिषद’ देवरुख येथील मराठा भवनमध्ये अत्यंत उत्साहात पार पडली. या महत्त्वपूर्ण परिषदेमध्ये विविध क्षेत्रांतून आलेल्या ५१ जणांनी सक्रिय सहभाग नोंदवला.
या परिषदेत जलसाक्षर समिती महाराष्ट्र राज्याचे जलयोद्धा शहनवाज शाह, जलप्रेमी युयुत्सु आर्ते, सोळजाई ग्रामदेवस्थानचे अध्यक्ष बापू गांधी, देवरुख महाविद्यालयाचे उपप्राचार्य सरदार पाटील आणि साडवलीचे प्रकाश डोंगरे यांनी उपस्थित मार्गदर्शन केले. तसेच देवरुखच्या नगराध्यक्षा सौ. मृणाल शेट्ये, माजी उपनगराध्यक्ष अभिजित शेट्ये, नगरसेवक रुपेश भागवत, माजी पंचायत समिती सभापती संतोष लाड यांच्यासह विविध गावांतील सरपंच, देवस्थानांचे पदाधिकारी, जलदूत आणि ग्रामस्थ मोठ्या संख्येने उपस्थित होते. कार्यक्रमादरम्यान उजगाव येथील शेतकऱ्यांनी आणलेल्या यंदाच्या ‘सप्तलिंगी लाल भाताचे’ मान्यवरांच्या हस्ते मुहूर्तपूजन करण्यात आले.
कृती आराखड्यातील महत्त्वाचे व प्रमुख निर्णय
परिषदेत उपस्थितांच्या चर्चेनंतर जलसंधारणासाठी एक ठोस प्राथमिक कृती आराखडा निश्चित करण्यात आला, ज्याचे प्रमुख मुद्दे पुढीलप्रमाणे आहेत:
समन्वय समिती: सप्तलिंगी नदीच्या कामांसाठी ५ सदस्यांची ‘सप्तलिंगी नदी परिषद समन्वय समिती’ स्थापन करण्यात येणार आहे.
गाव समित्या: नदीकाठावरील १९ गावांसह संपूर्ण पाणलोट क्षेत्रातील सहभागी होऊ इच्छिणाऱ्या प्रत्येक गावात पाच सदस्यांची समिती स्थापन केली जाईल.
वनराई बंधारे: ज्या गावांना नदीकाठावर वनराई बंधारे उभारायचे आहेत, त्यांनी तातडीने सप्तलिंगी नदी परिषदेशी संपर्क साधण्याचे आवाहन करण्यात आले आहे.
जलतारा खड्डे: शिवलिंग देवस्थानांमध्ये पूजेसाठी पाणी उपलब्ध व्हावे आणि भूजल पातळी वाढावी, यासाठी जलतारा खड्डे करण्याचे नियोजन असून ग्रामपंचायतीने प्रस्तावक दिल्यास २४ तासांत मंजुरी मिळवून काम सुरू करण्याचा प्रयत्न केला जाईल.
मार्लेश्वर येथे बंधारा: मार्लेश्वर देवस्थान, मारळ यांच्या मागणीनुसार शुक्रवार, ३० ऑक्टोबर रोजी सकाळी ८ वाजता देवस्थानाच्या पायथ्याशी व पार्किंगजवळील नदीपात्रात बंधारा उभारणीचे काम सुरू करण्याचे ठरले आहे.
कुडवली येथे पाहणी: बंधाऱ्याच्या मागणीनुसार वनविभागाच्या अधिकाऱ्यांसोबत प्रत्यक्ष जागेची पाहणी करून पुढील कार्यवाही केली जाईल.
जलस्रोतांचा शोध: प्रत्येक गावातील नैसर्गिक जलस्रोत, दुर्लक्षित विहिरी व तळी शोधून त्यांची सविस्तर माहिती परिषदेकडे सादर करावी लागणार आहे.
गावपातळीवर बैठका: ग्रामपंचायत, ग्रामदैवत देवस्थान व ग्रामस्थांना एकत्र आणून गावनिहाय जलसंधारण आराखडा तयार केला जाईल.
आभार व यशस्वी संयोजन
कार्यक्रमाचे सूत्रसंचालन क्रांती व्यापारीतर्फे सुरेंद्र ऊर्फ भाऊ शिंदे यांनी केले, तर अध्यक्ष निखिल कोळवणकर यांनी मनोगत व्यक्त करताना सर्वांना एकत्र येण्याचे आवाहन केले. सभागृह व चहाची व्यवस्था केल्याबद्दल बारक्या शेठ बने यांचे आभार मानण्यात आले. या परिषदेच्या यशस्वी आयोजनासाठी सचिव अण्णा बेर्डे, सहसचिव संदीप वेल्हाळ, आकाश भोपळे, प्रभाकर मांगले आणि साई कामेरकर यांनी विशेष मेहनत घेतली. गावागावांत जलसंधारणाची कामे उभी करून एकजुटीने दुष्काळावर मात करण्याचा दृढ निर्धार यादरम्यान व्यक्त करण्यात आला.
