चिपळूणची कन्या आकांक्षाचा सावर्डे येथे विशेष सन्मान
चिपळूण (रत्नागिरी):
Akanksha Kadam Carrom क्रीडा प्रकारात इटली येथे आयोजित होणाऱ्या ९ व्या जागतिक कॅरम चॅम्पियनशिप (Carrom World Championship) साठी भारतीय संघात निवड झाल्याबद्दल चिपळूणची सुकन्या, आंतरराष्ट्रीय कॅरमपटू व शिवछत्रपती पुरस्कार विजेती कु. आकांक्षा कदम हिचा आमदार शेखर निकम यांच्या हस्ते विशेष सत्कार करण्यात आला. सावर्डे येथील आमदारांच्या संपर्क कार्यालयात आयोजित एका भावूक आणि प्रेरणादायी कार्यक्रमात शाल, श्रीफळ आणि सन्मानचिन्ह (फोटो फ्रेम) देऊन आकांक्षाचा गौरव करण्यात आला.
अवघ्या १४ व्या वर्षी कॅरम खेळात अत्यंत उल्लेखनीय कामगिरी करणाऱ्या आकांक्षाने आतापर्यंत ६२ हून अधिक पदके पटकावून क्रीडा जगतात आपली एक वेगळी ओळख निर्माण केली आहे. यापूर्वी मालदीव येथे पार पडलेल्या सहाव्या एशियन कॅरम चॅम्पियनशिपमध्ये तिने सुवर्णपदक मिळवून आंतरराष्ट्रीय स्तरावर भारताचा आणि महाराष्ट्राचा नावलौकिक वाढवला आहे. आता इटली येथे होणाऱ्या आगामी जागतिक स्पर्धेत भारतीय संघाचे प्रतिनिधित्व करण्याची संधी मिळाल्याने आकांक्षाच्या यशात आणखी एक मानाचा तुरा रोवला गेला आहे.
ग्रामीण भागातील प्रतिकूल परिस्थितीतून पुढे येत केवळ जिद्द, कठोर मेहनत आणि सातत्यपूर्ण सरावाच्या जोरावर आकांक्षाने मिळवलेले हे अद्वितीय यश रत्नागिरी जिल्ह्यासह संपूर्ण महाराष्ट्रासाठी अत्यंत अभिमानास्पद ठरले आहे. सत्कारप्रसंगी आमदार शेखर निकम यांनी तिचे मनापासून अभिनंदन केले आणि आगामी जागतिक स्पर्धेसाठी शुभेच्छा दिल्या. इटलीच्या भूमीवर होणाऱ्या या जागतिक स्पर्धेतही आकांक्षा आपल्या उत्तम खेळाच्या जोरावर भारताचा तिरंगा अभिमानाने फडकवेल, असा दृढ विश्वास त्यांनी व्यक्त केला.
या गौरव सोहळ्याप्रसंगी जिल्हा परिषद सदस्य संजय कदम, पंचायत समिती सदस्य मंगेश बंडागळे, सागर तांदळे, पंकज पुसाळकर, सचिन साडविलकर, महाविद्यालयाचे प्राचार्य मंगेश भोसले यांच्यासह विविध क्षेत्रांतील मान्यवर, स्थानिक क्रीडाप्रेमी आणि कार्यकर्ते मोठ्या संख्येने उपस्थित होते. उपस्थितांनी आकांक्षावर अभिनंदनाचा वर्षाव करत तिच्या भावी क्रीडा वाटचालीस शुभेच्छा दिल्या. आंतरराष्ट्रीय स्तरावर सतत चमकदार कामगिरी करणाऱ्या आकांक्षाच्या या भरगोस यशामुळे चिपळूणसह रत्नागिरीच्या शिरपेचात मानाचा तुरा रोवला गेला असून, आता इटलीतील जागतिक स्पर्धेतील तिच्या कामगिरीकडे सर्वांचे लक्ष लागले आहे.
