सजवलेल्या एसटी बसमधून दिली अखेरची सेवा
चिपळूण (रत्नागिरी):
Mushtaq Madre MSRTC Chiplun च्या सेवेतून ३२ वर्षांच्या प्रदीर्घ आणि निष्कलंक प्रवासानंतर सन्मानाने सेवानिवृत्त झाले आहेत. चिपळूण तालुक्यातील सावर्डे येथील पिंपळ मोहल्ल्याचे रहिवासी असलेले महाराष्ट्र राज्य मार्ग परिवहन महामंडळाचे (एसटी) ज्येष्ठ चालक मुश्ताक अहमद माद्रे हे शनिवारी आपल्या ३२ वर्षांच्या अपघातविरहित सेवेनंतर निवृत्त झाले. आपल्या संपूर्ण सेवाकाळात प्रवाशांच्या सुरक्षिततेला सर्वोच्च प्राधान्य देत अत्यंत प्रामाणिकपणे कर्तव्य बजावणाऱ्या माद्रे यांचा निवृत्तीचा दिवस त्यांच्या कुटुंबीयांसह सहकारी आणि संपूर्ण सावर्डेकरांसाठी अत्यंत भावनिक ठरला.
विशेष म्हणजे, मुश्ताक माद्रे यांच्या कुटुंबाचा एसटी महामंडळाशी जुना आणि आपुलकीचा वारसा आहे. त्यांचे वडील अहमद माद्रे हेदेखील एसटी महामंडळात वाहक (कंडक्टर) म्हणून दीर्घकाळ कार्यरत होते. वडिलांच्या पावलावर पाऊल ठेवत मुश्ताक यांनीही एसटी महामंडळात चालक (ड्रायव्हर) म्हणून प्रवेश केला आणि तब्बल ३२ वर्षे सुरक्षित प्रवासी सेवा देण्याचा एक आदर्श वस्तुपाठ निर्माण केला.
सेवेतील हा शेवटचा दिवस संस्मरणीय आणि ऐतिहासिक ठरावा, यासाठी सहकाऱ्यांच्या वतीने त्यांची एसटी बस आकर्षक फुलांच्या माळा आणि रंगीबेरंगी फुग्यांनी सुंदररीत्या सजवण्यात आली होती. या सजवलेल्या बसमधूनच त्यांनी प्रवाशांना आपली शेवटची सेवा दिली. सावर्डे येथे सजवलेली एसटी बस पोहोचताच स्थानिक नागरिकांनी एकत्र येत मुश्ताक माद्रे यांचे ढोल-ताशांच्या गजरात स्वागत केले आणि पुष्पगुच्छ देऊन त्यांना पुढील वाटचालीस शुभेच्छा दिल्या.
या भावनिक निरोप समारंभास पंचायत समिती सदस्य शौकत माखजनकर, सावर्डे व्यापारी संघटनेचे अध्यक्ष सूर्यकांत चव्हाण, स्थानिक व्यापारी, परिसरातील नागरिक आणि माद्रे यांचा मित्रपरिवार मोठ्या संख्येने उपस्थित होता. हजारो प्रवाशांना त्यांच्या इच्छित स्थळी सुरक्षित पोहोचवण्याचे अत्यंत जबाबदारीचे काम करणाऱ्या एसटी चालकांमध्ये ३२ वर्षे एकही अपघात न होऊ देता सेवा बजावणे ही खरोखरच कौतुकास्पद आणि उल्लेखनीय बाब असल्याचे उपस्थितांनी नमूद केले. कर्तव्यनिष्ठा आणि प्रवाशांच्या सुरक्षेला प्राधान्य देणारे मुश्ताक माद्रे यांना पुढील आयुष्यासाठी उत्तम आरोग्य आणि दीर्घायुष्य लाभो, अशा सदिच्छा यावेळी व्यक्त करण्यात आल्या.
