आंतरराष्ट्रीय बाजारातील मंदीचा स्थानिक बाजारावर परिणाम; सोन्यापाठोपाठ चांदीच्या किमतीतही मोठी घसरण, जाणून घ्या सविस्तर भाव
सोन्याच्या किमतीत सुरू असलेली घसरण आठवड्याच्या पहिल्याच दिवशी, म्हणजेच १६ नोव्हेंबर रोजीही कायम राहिल्याने ग्राहकांना मोठा दिलासा मिळाला आहे. राजधानी दिल्ली, मुंबई, पुणे, बंगळुरू, कोलकाता आणि चेन्नईसह देशातील प्रमुख शहरांमध्ये सोने आणि चांदीच्या दरात मोठी घट नोंदवली गेली असून, आंतरराष्ट्रीय बाजारातील घडामोडींचा थेट परिणाम देशांतर्गत सराफा बाजारावर दिसून येत आहे.
राजधानी दिल्लीमध्ये २४ कॅरेट सोन्याचा दर १ लाख ३७ हजार ७६0 रुपये प्रति १० ग्रॅमवर पोहोचला आहे, तर मुंबई आणि कोलकाता सारख्या प्रमुख महानगरांमध्ये हाच दर १ लाख ३७ हजार ६१० रुपये प्रति १० ग्रॅम इतका नोंदवला गेला आहे. गेल्या आठवड्यातही सोन्याच्या दरात विक्रमी घसरण झाली होती, ज्यामध्ये २४ कॅरेट सोन्याचे दर प्रति १० ग्रॅममागे तब्बल ५,९५0 रुपयांनी कमी झाले होते, तर २२ कॅरेट सोन्याच्या दरात ५,४50 रुपयांची घट झाली होती.
देशातील इतर प्रमुख शहरांमधील सराफा बाजाराचा आढावा घेतल्यास, चेन्नईमध्ये सोन्याचे दर नेहमीप्रमाणे इतर शहरांच्या तुलनेत किंचित अधिक असल्याचे दिसून येते. चेन्नईमध्ये २४ कॅरेट सोन्याचा भाव १ लाख ३८ हजार ४८0 रुपये प्रति १० ग्रॅम, तर २२ कॅरेट सोन्याचा दर १ लाख २६ हजार ९४0 रुपये प्रति १० ग्रॅम आहे. याउलट, पुणे आणि बंगळुरू शहरांमध्ये २४ कॅरेट सोन्याचा भाव १ लाख ३७ हजार ६१० रुपये प्रति १० ग्रॅम आणि २२ कॅरेट सोन्याचा भाव १ लाख २६ हजार १४0 रुपये प्रति १० ग्रॅम एवढा आहे. तसेच दिल्लीत २२ कॅरेट सोन्यासाठी ग्राहकांना १ लाख २६ हजार २९0 रुपये मोजावे लागत आहेत.

फक्त सोनेच नव्हे, तर चांदीच्या दरातही मोठी घसरण होण्याचे सत्र सुरूच आहे. १६ नोव्हेंबर रोजी सकाळी मिळालेल्या आकडेवारीनुसार, चांदीचा भाव १ लाख ९४ हजार ९00 रुपये प्रति किलोवर आला आहे. विशेष म्हणजे, याच वर्षी जानेवारी महिन्यात देशात चांदीच्या किमतीने तब्बल ४ लाख रुपये प्रति किलोचा विक्रमी टप्पा गाठला होता, मात्र त्यानंतर झालेल्या तीव्र घसरणीने बाजाराचे गणित बदलले आहे. गेल्या केवळ एका आठवड्यात चांदीच्या दरात तब्बल १० हजार रुपयांची घट झाली आहे.
आंतरराष्ट्रीय बाजारातही सोन्या-चांदीच्या किमतीत मोठी मंदी पाहायला मिळत आहे. सध्या आंतरराष्ट्रीय बाजारात सोन्याचा भाव ३,८९२.४२ डॉलर प्रति औंस इतका आहे, तर गेल्या आठवड्यात जागतिक बाजारात सोन्याच्या किमतीत तब्बल ४.५ टक्क्यांची घसरण नोंदवली गेली. तसेच आंतरराष्ट्रीय बाजारात सध्या ‘स्पॉट सिल्व्हर’चा भाव ४८.८0 डॉलर प्रति औंस ट्रॅक करत आहे.
सध्या सोने आणि चांदीच्या किमती कमी होत असल्या तरी भविष्यात या मौल्यवान धातूंमध्ये मोठी वाढ होण्याचे संकेत तज्ज्ञांकडून दिले जात आहेत. इंडिया बुलियन अँड ज्वेलर्स असोसिएशनचे (IBJA) सचिव सुरेंद्र मेहता यांच्या अंदाजानुसार, २०२७ च्या अखेरपर्यंत आंतरराष्ट्रीय बाजारात सोन्याचा भाव ६,२०० डॉलर प्रति औंसपर्यंत पोहोचू शकतो, तर चांदीचा भाव १८0 डॉलर प्रति औंसपर्यंत जाण्याची शक्यता वर्तवली जात आहे. त्यामुळे सध्याचा हा दरघसरणीचा काळ खरेदीसाठी सुवर्णसंधी मानला जात असला, तरी ग्राहकांचे लक्ष आता बाजारातील आगामी घडामोडींकडे लागले आहे.













