कोकण रेल्वे मार्गावरील प्रवाशांच्या प्रलंबित समस्या आणि स्थानकांवरील मूलभूत सोयीसुविधांचा घेणार आढावा; नागरिकांना अडचणी मांडण्याचे आवाहन
Kiran Samant Konkan Railway मार्गावरील प्रवाशांच्या प्रलंबित समस्या जाणून घेण्यासाठी आणि रेल्वे स्थानकांवरील मूलभूत सोयीसुविधांची सद्यस्थिती तपासण्यासाठी मंगळवार, १७ नोव्हेंबर रोजी विशेष पाहणी दौरा करणार आहेत. रत्नागिरी जिल्ह्यातील लांजा आणि राजापूर तालुक्यांतील रेल्वे स्थानकांना ते प्रत्यक्ष भेट देऊन तेथील प्रवासी व स्थानिक नागरिकांशी संवाद साधणार आहेत.
कोकणातील नागरिकांसाठी रेल्वे हा दळणवळणाचा अत्यंत महत्त्वाचा आणि सोयीचा मार्ग मानला जातो. मात्र, या मार्गावरील अनेक स्थानकांवर मूलभूत सोयीसुविधांचा अभाव असल्याच्या तक्रारी प्रवासी आणि स्थानिक नागरिकांकडून सातत्याने केल्या जात आहेत. या तक्रारींची गंभीर दखल घेत राजापूर विधानसभा मतदारसंघाचे आमदार किरण सामंत यांनी या विशेष दौऱ्याचे आयोजन केले आहे.
या मूलभूत सोयीसुविधांची होणार पाहणी
या पाहणी दौऱ्यादरम्यान आमदार सामंत प्रत्येक स्थानकावर जाऊन प्रवाशांना भेडसावणाऱ्या प्रत्यक्ष अडचणींची तपासणी करणार आहेत. यामध्ये प्रामुख्याने खालील बाबींचा आढावा घेतला जाणार आहे:
- स्थानकांवरील पिण्याच्या पाण्याची सोय आणि स्वच्छतागृहांची सद्यस्थिती.
- फलाटांची उंची व अवस्था आणि प्रवाशांसाठी असलेले निवारा शेड.
- स्थानक परिसरातील प्रकाश व्यवस्था.
- स्थानिक प्रवाशांच्या सोयीसाठी महत्त्वाच्या एक्स्प्रेस गाड्यांचे थांबे.
या भेटीदरम्यान स्थानिक नागरिकांच्या मागण्या व अडचणी सविस्तरपणे जाणून घेतल्या जातील आणि त्या सोडवण्यासाठी रेल्वे प्रशासनाकडे ठोस पाठपुरावा केला जाणार असल्याचे स्पष्ट करण्यात आले आहे.
असा असेल मंगळवार, १७ नोव्हेंबरचा पाहणी दौरा
आमदार किरण सामंत यांचा दिवसभराचा पाहणी दौरा सकाळी ११ वाजता सुरू होऊन सायंकाळी राजापूर रोड स्थानकावर संपणार आहे. निवसर, आडवली, वेरवली, विलवडे, सौंदळ आणि राजापूर रोड या स्थानकांना ते भेट देतील. दौऱ्याचे सविस्तर वेळापत्रक पुढीलप्रमाणे आहे:
- सकाळी ११.०० वा.: निवसर रेल्वे स्थानक (ता. लांजा, जि. रत्नागिरी)
- दुपारी १.०० वा.: आडवली रेल्वे स्थानक (ता. लांजा, जि. रत्नागिरी)
- दुपारी २.०० वा.: वेरवली रेल्वे स्थानक (ता. लांजा, जि. रत्नागिरी)
- दुपारी ३.३० वा.: विलवडे रेल्वे स्थानक (ता. लांजा, जि. रत्नागिरी)
- सायंकाळी ४.३० वा.: सौंदळ रेल्वे स्थानक (ता. राजापूर, जि. रत्नागिरी)
- सायंकाळी ५.३० वा.: राजापूर रोड रेल्वे स्थानक (ता. राजापूर, जि. रत्नागिरी)
राजापूर विधानसभा मतदारसंघातील रेल्वे स्थानकांचा सर्वांगीण विकास साधण्यावर आणि प्रवाशांचे प्रलंबित प्रश्न मार्गी लावण्यावर या दौऱ्यात विशेष भर दिला जाणार आहे. तरी संबंधित भागातील प्रवाशांनी व नागरिकांनी या पाहणी दौऱ्यादरम्यान उपस्थित राहून आपल्या समस्या मांडाव्यात, असे आवाहन करण्यात आले आहे.














