चिपळूण, १७ एप्रिल २०२५: चिपळूण तालुक्यातील रामवाडी, दळवटणे येथे जमिनीच्या वादातून दोन जणांवर हल्ला करून जखमी करण्याची घटना घडली आहे. या प्रकरणी निलेश रमेश चव्हाण आणि राकेश रमेश चव्हाण (दोघेही रा. रामवाडी, दळवटणे) यांच्याविरुद्ध भारतीय न्यायसंहिता २०२३ चे कलम ११८(१), ३५२, ३५१(२)(३), ३(५) अंतर्गत गुन्हा दाखल करण्यात आला आहे.
फिर्यादी भरत सीताराम जाधव (वय ४०, रा. कळंबस्ते, चिपळूण, मूळ रा. रामवाडी, दळवटणे) आणि त्यांचे वडील सीताराम शिवराम जाधव (वय ८०) यांच्यासह कुटुंबीय आणि एक कामगार शिवगण (पूर्ण नाव माहित नाही) हे १६ एप्रिल २०२५ रोजी सकाळी ९:०० वाजता त्यांच्या मालकीच्या सर्वे नं. ८२७ मधील जमिनीवर लाकडे तोडण्यासाठी गेले होते. यावेळी आरोपी निलेश आणि राकेश चव्हाण यांनी तिथे येऊन जमिनीच्या मालकीवरून वाद घालण्यास सुरुवात केली.
फिर्यादींनी वाद टाळण्यासाठी समजावण्याचा प्रयत्न केला आणि घरी परतण्यास निघाले. मात्र, आरोपींनी पाठीमागून येऊन लाकडी काठीने फिर्यादी भरत जाधव आणि त्यांच्या वडिलांवर अचानक हल्ला केला. या हल्ल्यात दोघेही जखमी झाले. याशिवाय, आरोपींनी शिवीगाळ करत ठार मारण्याची धमकी दिली. या घटनेची तक्रार फिर्यादींनी चिपळूण पोलिस स्टेशनमध्ये नोंदवली. त्यानुसार, १६ एप्रिल २०२५ रोजी दुपारी ४:३८ वाजता गुन्हा दाखल करण्यात आला आहे.
या हल्ल्यात भरत सीताराम जाधव आणि सीताराम शिवराम जाधव हे दोघे जखमी झाले आहेत. त्यांच्यावर वैद्यकीय उपचार सुरू आहेत. चिपळूण पोलिसांनी या प्रकरणाचा तपास सुरू केला असून, जमिनीच्या वादाशी संबंधित कागदपत्रे आणि साक्षीदारांचे जबाब नोंदवण्याचे काम सुरू आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:44 17-04-2025
