रत्नागिरी: संपूर्ण रत्नागिरी जिल्ह्याला हादरवून सोडणाऱ्या तिहेरी हत्याकांडाच्या तपासात आज एक मोठी आणि महत्त्वाची कारवाई करण्यात आली आहे. या हत्याकांडाचे केंद्रबिंदू ठरलेला आणि मुख्य आरोपी दुर्वास पाटील याच्या कुटुंबीयांच्या मालकीचा असलेला जयगड-खंडाळा येथील ‘सायली देशी बार’ अखेर सील करण्यात आला आहे. रत्नागिरी पोलिसांच्या अहवालानंतर राज्य उत्पादन शुल्क विभागाने ही धडक कारवाई केली.
गुन्ह्यांचे केंद्र ठरलेला ‘सायली बार’
पोलीस तपासात समोर आलेल्या माहितीनुसार, ‘सैतान’ दुर्वास पाटील याने केलेल्या तिन्ही खुनांचे धागेदोरे याच सायली देशी बारशी जोडलेले आहेत.
- याच ठिकाणी झालेल्या वादातून आणि जबर मारहाणीत सीताराम लक्ष्मण वीर यांचा खून झाल्याचे स्पष्ट झाले आहे.
- भक्ती मयेकर आणि राकेश जंगम यांच्या हत्येचा कट आणि घटनाक्रमही याच परिसरात घडल्याचा पोलिसांना दाट संशय आहे.
- त्यामुळे गुन्ह्याचे प्रमुख घटनास्थळ म्हणून पोलिसांनी या जागेची नोंद केली होती. हा बार मुख्य आरोपी दुर्वास पाटील याच्याच कुटुंबीयांच्या मालकीचा असल्याने प्रकरणाचे गांभीर्य अधिक वाढले होते.
हत्याकांडानंतरही बार होता सुरूच
या प्रकरणातील धक्कादायक बाब म्हणजे, हे तिहेरी हत्याकांड उघडकीस आल्यानंतर आणि पोलिसांनी घटनास्थळाचा पंचनामा केल्यानंतर अवघ्या चार दिवसांतच हा बार पुन्हा सुरू करण्यात आला होता. गुन्हेगारीचे केंद्र ठरलेली जागा पुन्हा सुरू झाल्याने स्थानिक नागरिकांमध्ये भीती आणि संतापाचे वातावरण होते. यावर प्रशासनाने कारवाई करावी, अशी जोरदार मागणी जोर धरत होती.
पोलिसांचा अहवाल आणि उत्पादन शुल्क विभागाची कारवाई
या प्रकरणाचे गांभीर्य लक्षात घेऊन रत्नागिरी जिल्हा पोलीस दलाने ‘सायली देशी बार’ हा गुन्ह्याचे घटनास्थळ असल्याने आणि भविष्यात कायदा व सुव्यवस्थेचा प्रश्न निर्माण होऊ नये यासाठी तो बंद करावा, असा सविस्तर अहवाल राज्य उत्पादन शुल्क विभागाला सादर केला होता. या अहवालाची तातडीने दखल घेत उत्पादन शुल्क विभागाने आज (दि. ४ सप्टेंबर २०२५) रोजी सायली देशी बारला सील ठोकले आहे.
या कारवाईमुळे हत्याकांडाच्या तपासातील एक महत्त्वाचा टप्पा पार पडला असून, आरोपींच्या गुन्हेगारी कृत्यांना पाठबळ देणाऱ्या जागेवर कारवाई झाल्याने नागरिकांमधून समाधान व्यक्त होत आहे.
