कोलकाता: पश्चिम बंगालच्या राजकीय इतिहासात आज एक मोठा टर्निंग पॉईंट पाहायला मिळाला. विधानसभा निवडणुकीतील पराभवानंतरही मुख्यमंत्री ममता बॅनर्जी यांनी राजीनामा देण्यास स्पष्ट नकार दिला होता. अखेर राज्यपालांनी आपल्या संवैधानिक अधिकारांचा वापर करत पश्चिम बंगालचे मंत्रिमंडळ बरखास्त केले आहे. ८ मे २०२१ रोजी सुरू झालेला या विधानसभेचा कार्यकाळ ७ मे २०२६ रोजी पूर्ण झाल्याने नियमानुसार जुनी विधानसभा भंग करण्यात आली आहे.
“हा निकाल म्हणजे कारस्थान”; ममता बॅनर्जींचे गंभीर आरोप
निवडणुकीच्या निकालानंतर मंगळवारी (६ मे २०२६) पत्रकारांशी बोलताना ममता बॅनर्जी यांनी आक्रमक पवित्रा घेतला. “मी राजीनामा देणार नाही,” असे ठामपणे सांगत त्यांनी या निकालावर प्रश्नचिन्ह उपस्थित केले. त्यांच्या आरोपातील प्रमुख मुद्दे खालीलप्रमाणे आहेत:
- निवडणूक आयोगावर निशाणा: “टीएमसीची लढाई भाजपशी नसून निवडणूक आयोगाशी होती. आयोगाने भाजपसाठी काम केले,” असा थेट आरोप त्यांनी केला.
- जनादेशाची लूट: जवळपास १०० जागांवर जनादेशाची लूट झाली असून पक्षाचे मनोबल खच्ची करण्यासाठी मुद्दाम मतमोजणी संथ गतीने करण्यात आली, असे त्या म्हणाल्या.
- रस्त्यावरची लढाई: “आता मी मुक्त पक्ष्याप्रमाणे आहे. रस्त्यावर उतरून अत्याचार आणि अन्यायाविरुद्ध लढा देऊ,” असे म्हणत त्यांनी राष्ट्रीय स्तरावर ‘इंडिया’ आघाडी मजबूत करण्यावर भर देणार असल्याचे स्पष्ट केले.
९ मे रोजी भाजपचा ऐतिहासिक शपथविधी
पश्चिम बंगालमध्ये पहिल्यांदाच भाजपचे सरकार स्थापन होणार आहे. या ऐतिहासिक सोहळ्यासाठी जय्यत तयारी सुरू आहे:
- स्थळ: कोलकाता येथील ऐतिहासिक ब्रिगेड परेड ग्राऊंड.
- दिनांक: ९ मे २०२६.
- सुरक्षा: सोहळ्यासाठी ४,००० पेक्षा जास्त पोलीस कर्मचारी तैनात करण्यात आले असून कडेकोट सुरक्षा व्यवस्था ठेवण्यात आली आहे.
दिग्गजांची मांदियाळी
या सोहळ्याला देशातील बडे नेते उपस्थित राहणार आहेत. यामध्ये पंतप्रधान नरेंद्र मोदी, गृहमंत्री अमित शाह, संरक्षण मंत्री राजनाथ सिंह, भाजप अध्यक्ष नितीन नबीन यांच्यासह भाजपशासित राज्यांचे मुख्यमंत्री उपस्थित राहण्याची दाट शक्यता आहे.
घटनात्मक पेच आणि राज्यपालांची भूमिका
ममता बॅनर्जी यांनी राजीनामा देण्यास नकार दिल्यानंतर राज्यात घटनात्मक पेच निर्माण झाला होता. मात्र, विधानसभेचा ५ वर्षांचा कार्यकाळ ७ मे रोजी संपत असल्याने, राज्यपालांनी मंत्रिमंडळ बरखास्त करून नवीन सरकार स्थापनेचा मार्ग मोकळा केला. बंगालच्या राजकारणातील हा बदल केवळ राज्यासाठीच नव्हे, तर देशाच्या राजकारणासाठी अत्यंत महत्त्वाचा मानला जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:15 08-05-2026
