नवी दिल्ली: वैद्यकीय शिक्षणासाठी अत्यंत महत्त्वाची मानली जाणारी ‘नीट’ (NEET) प्रवेश परीक्षा अखेर केंद्र सरकारकडून रद्द करण्यात आली आहे. ३ मे २०२६ रोजी झालेल्या या परीक्षेची प्रश्नपत्रिका तब्बल ४२ तास आधीच फुटल्याने देशभरातून संताप व्यक्त केला जात होता. या गंभीर प्रकाराची दखल घेत राष्ट्रीय परीक्षा यंत्रणेने (NTA) परीक्षा रद्द करण्याचा मोठा निर्णय घेतला आहे.
पेपरफुटीमुळे २२ लाख विद्यार्थ्यांचे भवितव्य टांगणीला
देशभरातून सुमारे २२ लाख विद्यार्थ्यांनी यंदा ३ मे रोजी नीटची परीक्षा दिली होती, ज्यामध्ये महाराष्ट्रातील जवळपास अडीच लाख विद्यार्थ्यांचा समावेश होता. मात्र, परीक्षेच्या ४२ तास आधीच व्हॉट्सॲपवर प्रश्नपत्रिका लीक झाल्याचे समोर आले. मोठ्या प्रमाणावर पेपरफुटी झाल्याने परीक्षेची विश्वासार्हता संपल्याचा आरोप करत केंद्राने ही परीक्षा रद्द करून तिची चौकशी सीबीआयमार्फत (CBI) करण्याचे आदेश दिले आहेत.
पुनर्परीक्षेसाठी महत्त्वाच्या सूचना:
- नवी तारीख: परीक्षेची नवीन तारीख लवकरच अधिकृतरीत्या जाहीर केली जाईल.
- नोंदणी (Registration): विद्यार्थ्यांनी आधीच नोंदणी केलेली असल्याने त्यांना नव्याने रजिस्ट्रेशन करण्याची गरज नाही.
- परीक्षा शुल्क: पुनर्परीक्षेसाठी विद्यार्थ्यांकडून कोणतेही अतिरिक्त शुल्क आकारले जाणार नाही.
- परीक्षा केंद्र: ३ मे रोजी जे परीक्षा केंद्र होते, तेच केंद्र नव्या परीक्षेसाठीही कायम राहणार आहे.
- ओळखपत्र: विद्यार्थ्यांना नव्या परीक्षेसाठी नवीन ओळखपत्र (Admit Card) दिले जाणार आहे.
राहुल गांधी आणि रोहित पवारांचा सरकारवर घणाघात
लोकसभा विरोधी पक्षनेते राहुल गांधी यांनी या मुद्द्यावरून केंद्र सरकारवर जोरदार टीका केली आहे. “नीट आता परीक्षा राहिली नसून एक लिलाव बनला आहे. २२ लाख विद्यार्थ्यांचा विश्वास तुटला असून, गेल्या १० वर्षांत ८९ वेळा पेपर लीक झाले आहेत,” अशा शब्दांत त्यांनी आपला संताप व्यक्त केला.
तसेच, राष्ट्रवादी काँग्रेस (शरद पवार गट) नेते रोहित पवार यांनीही या प्रकरणातील आर्थिक गैरव्यवहारावर बोट ठेवले. “गेस पेपरमधील १३१ प्रश्न जसेच्या तसे येणे हा पैशांचा मोठा खेळ आहे. अशा दलालांमुळे प्रामाणिक विद्यार्थ्यांच्या स्वप्नांची राखरांगोळी होत आहे,” असे त्यांनी म्हटले आहे.
विद्यार्थ्यांनी अफवांवर विश्वास ठेवू नका
राष्ट्रीय परीक्षा यंत्रणेने (NTA) विद्यार्थी आणि पालकांना केवळ अधिकृत सूचनांकडेच लक्ष देण्याचे आवाहन केले आहे. ही परीक्षा पारदर्शकपणे पुन्हा घेण्यासाठी प्रशासन सज्ज असून लवकरच नवीन वेळापत्रक प्रसिद्ध केले जाईल.
बातमीचे महत्त्वाचे मुद्दे:
- रद्द झालेली परीक्षा: ३ मे २०२६ रोजी झालेली नीट (NEET).
- कारण: परीक्षेच्या ४२ तास आधी झालेली पेपरफुटी.
- तपास: सीबीआय (CBI) मार्फत चौकशी सुरू.
- पुनर्परीक्षा: विद्यार्थ्यांसाठी जुनेच केंद्र राहणार, नवे ओळखपत्र दिले जाणार.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:12 12-05-2026
