मुंबई: वैद्यकीय प्रवेशासाठी घेतली जाणारी ‘नीट’ (NEET) परीक्षा सध्या पेपरफुटी आणि निकालातील गोंधळामुळे देशभरात वादाच्या भोवऱ्यात सापडली आहे. या प्रकरणावरून महाराष्ट्र नवनिर्माण सेनेचे अध्यक्ष राज ठाकरे यांनी केंद्र सरकारवर अत्यंत तिखट शब्दांत टीका केली असून, २२ लाख विद्यार्थ्यांच्या भविष्याशी खेळणाऱ्या केंद्रीय शिक्षणमंत्र्यांचा तात्काळ राजीनामा घेण्याची मागणी केली आहे. तसेच, महाराष्ट्रानेही तामिळनाडू प्रमाणेच ‘नीट’ला ठाम विरोध करावा, असे आवाहन त्यांनी राज्य सरकारला केले आहे.
“शिक्षणमंत्र्यांचा तात्काळ राजीनामा घ्या”
राज ठाकरे यांनी सोशल मीडियावर शेअर केलेल्या आपल्या सविस्तर पोस्टमध्ये केंद्रीय शिक्षणमंत्री धर्मेंद्र प्रधान यांच्यावर थेट निशाणा साधला आहे. “इतकी वर्षे एकच माणूस केंद्रीय शिक्षण मंत्री म्हणून चिकटून बसला आहे. त्यांच्या काळात नीटमध्ये इतके घोळ झाले, तरीही हे महाशय तिथेच आहेत. पंतप्रधानांनी २२ लाख विद्यार्थ्यांच्या आयुष्याशी खेळ करणाऱ्या या मंत्र्याचा तात्काळ राजीनामा घ्यावा,” अशी मागणी त्यांनी केली आहे.
२०१६ पासूनचा विरोध आणि कोचिंग क्लासेसचे जाळे
राज ठाकरे यांनी नमूद केले की, त्यांनी २०१६ पासूनच ‘नीट’ परीक्षेला आक्षेप नोंदवला होता. “सगळं एकछत्री अंमलाखाली आणण्याच्या केंद्र सरकारच्या खुमखुमीमुळे विद्यार्थ्यांच्या आयुष्याचा खेळखंडोबा झाला आहे. या परीक्षांमुळे केवळ आर्थिकदृष्ट्या सक्षम पालकांच्या मुलांनाच फायदा होतो, कारण ते महागडे कोचिंग क्लासेस लावू शकतात. हे क्लासवाले आर्थिक शक्तीच्या जोरावर निकाल वाकवतात आणि सामान्य घरातील मुले भरडली जातात,” असेही ते म्हणाले.
उत्तर विरुद्ध दक्षिण भारताचा मुद्दा
या प्रकरणात राज ठाकरेंनी एक महत्त्वाचा प्रादेशिक मुद्दाही उपस्थित केला. ते म्हणाले, “दक्षिण भारतातील ५ राज्ये आणि महाराष्ट्र मिळून ३५० हून अधिक मेडिकल कॉलेजेस आहेत, तर उत्तर भारतातील मोठ्या राज्यांत केवळ १८० कॉलेजेस आहेत. उत्तरेतील विद्यार्थी दक्षिणेत घुसवण्यासाठीच २०१६ पासून हा सगळा अट्टाहास सुरू आहे. दक्षिणेतील नेते आणि तामिळनाडूचे मुख्यमंत्रीही याला विरोध करत आहेत, महाराष्ट्रानेही आता आपला पाठीचा कणा ताठ दाखवला पाहिजे.”
महाराष्ट्र सरकारला थेट सवाल
राज्य सरकारमधील मंत्र्यांवर टीका करताना राज ठाकरे म्हणाले की, “जर महाराष्ट्रातील मेडिकल कॉलेजेसमध्ये मराठी मुलांनाच प्रवेश मिळणार नसेल, तर सरकारचा उपयोग काय? सध्या सरकार इंधन बचतीचा जो इव्हेंट (इलेक्ट्रिक कारचा वापर) करत आहे, तो केवळ एका दिवसाच्या फोटोपुरता आहे. त्यापेक्षा राज्याच्या हितासाठी ‘नीट’ रद्द करण्याबाबत ठाम भूमिका घ्या.”
सडलेल्या व्यवस्थेतून कोणते डॉक्टर बाहेर पडणार?
पेपरफुटीच्या जाळ्यावर भाष्य करताना त्यांनी चिंता व्यक्त केली की, १० लाख रुपयांना पेपर विकले जात आहेत. “अशा सडलेल्या व्यवस्थेतून जे डॉक्टर्स बाहेर पडतील, त्यांच्या हातात आपण आपले आरोग्य देणार आहोत का?” असा गंभीर सवाल त्यांनी उपस्थित केला आहे.
या पेपरफुटीचे धागेदोरे महाराष्ट्रातील नाशिक आणि पुणे येथेही सापडले असल्याने आणि प्रकरणाचा तपास सीबीआयकडे सोपवला असल्याने, राज ठाकरे यांची ही पोस्ट राजकीय आणि सामाजिक वर्तुळात मोठी चर्चेची ठरत आहे.
