रत्नागिरी: फेब्रुवारी-मार्चमध्ये झालेल्या मुख्य परीक्षेत अनुत्तीर्ण झालेल्या किंवा श्रेणी सुधारू इच्छिणाऱ्या विद्यार्थ्यांसाठी एक महत्त्वाची बातमी आहे. महाराष्ट्र राज्य माध्यमिक व उच्च माध्यमिक शिक्षण मंडळाने जून-जुलै २०२६ मध्ये आयोजित करण्यात येणाऱ्या १० वी आणि १२ वीच्या पुरवणी परीक्षांचे अंतिम वेळापत्रक अधिकृतपणे जाहीर केले आहे.
२६ जूनपासून परीक्षांचा श्रीगणेशा
राज्य मंडळाच्या पुणे, नागपूर, मुंबई, कोकण यांसह सर्व नऊ विभागीय मंडळांमार्फत या परीक्षा घेतल्या जाणार आहेत. जाहीर वेळापत्रकानुसार:
- बारावी (HSC): लेखी परीक्षा २६ जून ते ८ जुलै २०२६ या कालावधीत पार पडेल.
- दहावी (SSC): लेखी परीक्षा २६ जून ते ३० जून २०२६ या दरम्यान आयोजित करण्यात आली आहे.
लेखी परीक्षांसोबतच विद्यार्थ्यांच्या प्रात्यक्षिक, श्रेणी, तोंडी आणि अंतर्गत मूल्यमापन परीक्षा देखील याच कालावधीत घेतल्या जाणार आहेत.
छापील वेळापत्रकच ठरणार अंतिम
शिक्षण मंडळाने विद्यार्थ्यांना एक महत्त्वाचा इशारा दिला आहे. मंडळाच्या संकेतस्थळावर उपलब्ध असलेले वेळापत्रक हे केवळ माहितीसाठी आहे. प्रत्यक्ष परीक्षेच्या तारखांची खात्री करण्यासाठी विद्यार्थ्यांनी आपल्या शाळा किंवा कनिष्ठ महाविद्यालयांकडे देण्यात येणाऱ्या छापील वेळापत्रकाचाच आधार घ्यावा.
सोशल मीडियावरील वेळापत्रकावर विश्वास ठेवू नका
सध्या व्हॉट्सअॅप किंवा इतर सोशल मीडिया माध्यमांवर अनेकदा चुकीची वेळापत्रके व्हायरल होतात. अशा कोणत्याही अनधिकृत वेळापत्रकावर विद्यार्थ्यांनी विश्वास ठेवू नये. अन्य कोणत्याही यंत्रणेने छपाई केलेले वेळापत्रक ग्राह्य धरल्यास आणि त्यातून विद्यार्थ्याचे नुकसान झाल्यास त्याला राज्य मंडळ जबाबदार राहणार नाही, असे प्रशासनाकडून स्पष्ट करण्यात आले आहे.
बारावीचा निकाल नुकताच जाहीर झाला असून, जे विद्यार्थी या परीक्षेत यशस्वी होऊ शकले नाहीत, त्यांच्यासाठी ही पुरवणी परीक्षा म्हणजे उच्च शिक्षणाचे वर्ष वाचवण्याची सुवर्णसंधी आहे.
