सुदैवाने जीवितहानी टळली; रत्नागिरीतील भाजपा पदाधिकारी आणि नगरसेवकांच्या मध्यस्थीने विद्युत पुरवठा पूर्ववत
रत्नागिरी:
Ratnagiri MSEDCL (महावितरण) आणि रत्नागिरी नगर परिषदेच्या कर्मचाऱ्यांनी दाखवलेल्या तत्परतेमुळे शहरातील स्टेट बँक कॉलनी परिसरातील एक मोठा संभाव्य धोका टळला आहे. रविवारी सकाळी सुमारे ६ वाजण्याच्या सुमारास झालेल्या मुसळधार पाऊस आणि जोरदार वाऱ्यामुळे येथील श्री. संकेत चाळके यांच्या आवारातील एक माड (नारळाचे झाड) अचानक तुटून थेट विद्युत तारा व केबलच्या वायरमध्ये अडकला. सकाळीच घडलेल्या या घटनेमुळे परिसरात काही काळ भीतीचे वातावरण होते, मात्र सुदैवाने यात कोणतीही जीवितहानी झाली नाही आणि एक मोठा अनर्थ टळला.
लोकप्रतिनिधी आणि पदाधिकाऱ्यांची घटनास्थळी धाव
झाड कोसळल्याची माहिती मिळताच रत्नागिरी शहर भाजपाचे उपाध्यक्ष शैलेश बेर्डे, उपाध्यक्ष नितीन गांगण, जिल्हा महिला मोर्चाच्या उपाध्यक्षा सौ. सायली बेर्डे तसेच स्थानिक नगरसेवक श्री. केतन शेट्ये यांनी तातडीने परिस्थितीची पाहणी केली. त्यांनी विलंब न लावता महावितरण (Ratnagiri MSEDCL) आणि रत्नागिरी नगर परिषदेच्या संबंधित अधिकारी व कर्मचाऱ्यांशी संपर्क साधून घटनेचे गांभीर्य लक्षात आणून दिले.
युद्धपातळीवर काम करून वीजपुरवठा केला सुरळीत
पदाधिकाऱ्यांच्या सूचनेनंतर महावितरण आणि नगर परिषदेची आपत्कालीन यंत्रणा तात्काळ घटनास्थळी दाखल झाली. कर्मचाऱ्यांनी अत्यंत सावधगिरी बाळगत विद्युत तारांमध्ये अडकलेला माड हटविण्याचे काम हाती घेतले. झाड बाजूला केल्यानंतर वीजवाहिन्यांची दुरुस्ती करून परिसरातील खंडित झालेला विद्युत पुरवठा पूर्ववत करण्यात आला. संबंधित दोन्ही यंत्रणांनी दाखवलेल्या या वेगवान आणि तत्पर कार्यवाहीमुळे नागरिकांनी सुटकेचा श्वास सोडला असून परिसरातील रहिवाशांकडून समाधान व्यक्त केले जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
17:40 06-07-2026
