रत्नागिरी: रत्नागिरी तालुक्यातील जांभारी परिसर मंगळवारी (१९ मे) सकाळी झालेल्या एका भीषण आणि अत्यंत धक्कादायक स्फोटाने हादरून गेला आहे. वाटद पोलीस चौकी हद्दीतील जांभारी फाटा येथे लाकडे आणण्यासाठी गेलेल्या एका महिलेच्या हातातच गावठी बॉम्ब फुटल्याची दुर्दैवी घटना घडली आहे. सकाळी साडेसातच्या सुमारास झालेल्या या भीषण स्फोटामुळे संपूर्ण रत्नागिरी जिल्ह्यात एकच खळबळ उडाली आहे.
संशयास्पद वस्तू उचलताच भीषण स्फोट; महिला गंभीर
मिळालेल्या माहितीनुसार, रेश्मा प्रमोद सुर्वे (वय ४५, रा. जांभारी फाटा, रत्नागिरी) या महिला नेहमीप्रमाणे मंगळवारी सकाळी गावातील जंगल परिसरात लाकडे गोळा करण्यासाठी गेल्या होत्या. लाकडे शोधत असताना त्यांना तिथे एक संशयास्पद वस्तू पडलेली दिसली. त्यांनी ती वस्तू नेमकी काय आहे, हे पाहण्यासाठी हातात उचलताच तिचा प्रचंड वेगाने स्फोट झाला.
हा स्फोट इतका भीषण होता की, त्यामध्ये रेश्मा सुर्वे यांच्या डाव्या हाताची बोटे तुटली असून त्या गंभीररीत्या भाजल्या आहेत. स्फोटानंतर त्या रक्तबंबाळ अवस्थेत जमिनीवर कोसळल्या. आजूबाजूच्या नागरिकांनी त्यांना तातडीने रत्नागिरी जिल्हा शासकीय रुग्णालयात दाखल केले. मात्र, त्यांची प्रकृती चिंताजनक असल्याने पुढील उपचारासाठी त्यांना तातडीने मुंबई येथे हलवण्यात आले आहे.
परिसरात सापडले तब्बल २० ते २५ जिवंत गावठी बॉम्ब!
या घटनेची माहिती मिळताच पोलिसांनी तात्काळ घटनास्थळी धाव घेतली. मात्र, त्यानंतर जी माहिती समोर आली, त्याने पोलिसांचेही धाबे दणाणले. पोलिसांनी परिसराची झडती घेतली असता, तिथे तब्बल २० ते २५ जिवंत गावठी बॉम्ब आढळून आले. एकाच ठिकाणी एवढ्या मोठ्या प्रमाणावर जिवंत स्फोटके सापडल्याने परिसरात भीतीचे वातावरण निर्माण झाले आहे.
जयगड पोलिसांकडून तपास सुरू; परिसर सील
जंगलात शिकारीसाठी की अन्य कोणत्या घातपाताच्या उद्देशाने ही स्फोटके लपवून ठेवली होती? ही स्फोटके नेमकी कुणी आणली? असे गंभीर प्रश्न आता उपस्थित होत आहेत.
घटनेचे गांभीर्य ओळखून जयगड पोलीस ठाण्याचे पथक आणि वरिष्ठ पोलीस अधिकाऱ्यांनी घटनास्थळी धाव घेतली असून संपूर्ण परिसर सील केला आहे. तसेच, ‘बॉम्ब शोध व नाशक पथकाला’ (BDDS) पाचारण करण्यात आले असून पुढील तपास युद्धपातळीवर सुरू आहे.
घटनेचे मुख्य मुद्दे (Quick Highlights):
- घटनास्थळ: जांभारी फाटा (जंगल परिसर), ता. रत्नागिरी.
- जखमी महिला: रेश्मा प्रमोद सुर्वे (वय ४५, प्रकृती गंभीर).
- कारवाई: संपूर्ण परिसर सील; २० ते २५ जिवंत गावठी बॉम्ब जप्त.
- तपास यंत्रणा: जयगड पोलीस आणि बॉम्ब शोध पथक.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:36 20-05-2026
