मुंबई: मुंबईत गेल्या ५ दिवसांपासून कोसळणाऱ्या मुसळधार पावसाने आज सकाळपासून काहीशी विश्रांती घेतली असली, तरी मागील अर्धा तासापासून पश्चिम उपनगरात पुन्हा पावसाला सुरुवात झाली आहे. दहिसर, बोरिवली, कांदिवली, मालाड, गोरेगाव, जोगेश्वरी, अंधेरी, विलेपार्ले आणि वांद्रे या परिसरात पावसाच्या सरारी पुन्हा सुरू झाल्या आहेत. मात्र, सध्या पावसाचा जोर कमी असल्यामुळे पश्चिम उपनगरातील सखल भागांत अजून तरी पाणी साचलेले नाही. दरम्यान, गेल्या तीन ते पाच दिवसांत झालेल्या वादळी पावसामुळे मुंबईत मोठ्या प्रमाणावर वृक्षकोसळीच्या घटना घडल्या आहेत.
Mumbai Rain Tree Collapse: ३ दिवसांत ४०० झाडे आणि ६०० फांद्या कोसळल्या; उद्यान विभागाकडून युद्धपातळीवर काम
मुंबई महानगरपालिका (BMC) क्षेत्रात मागील तीन दिवसांच्या मुसळधार पावसामध्ये आणि वेगवान वाऱ्यामुळे तब्बल ४०० झाडे उन्मळून पडली आहेत, तर ६०० हून अधिक मोठ्या फांद्या तुटून पडल्याची अधिकृत नोंद महापालिकेकडे झाली आहे. एवढ्या मोठ्या प्रमाणावर झाडे पडल्यामुळे अनेक रस्ते आणि पादचारी मार्ग (फुटपाथ) बंद झाले आहेत. महापालिकेच्या गार्डन (उद्यान) विभागाकडून हे अडथळे दूर करण्यासाठी आणि रस्ते मोकळे करण्यासाठी युद्धपातळीवर ठिकठिकाणी काम सुरू आहे.
दादर, माहीम आणि शिवाजी पार्क परिसराला मोठा फटका; फुटपाथ व्यापले
मुंबईतील मध्यवर्ती भाग असलेल्या दादर, माहीम आणि प्रभादेवी परिसरात सर्वाधिक नुकसान झाल्याची माहिती समोर आली आहे. या भागात १०० च्या जवळपास झाडे आणि मोठ्या फांद्या पडल्याची नोंद झाली आहे. विशेषतः प्रसिद्ध शिवाजी पार्क परिसर आणि त्याच्या आसपासच्या रस्त्यांवर पडलेली झाडे आणि फांद्यांमुळे फुटपाथ पूर्णपणे व्यापून गेले आहेत. आपला परिसर लवकरात लवकर स्वच्छ आणि रहदारीसाठी मोकळा व्हावा, यासाठी महापालिकेचे अधिकारी, कर्मचारी आणि स्थानिक राजकीय पक्षांचे पदाधिकारी रस्त्यावर उतरून प्रयत्न करत आहेत.
‘वर्षाला पडतात तेवढी ५०% झाडे एकाच दिवसात पडली’; महापालिका आयुक्तांची माहिती
यंदाच्या पावसाळ्याच्या सुरुवातीबाबत माहिती देताना मुंबई महानगरपालिका आयुक्त अश्विनी भिडे यांनी चिंता व्यक्त केली आहे. त्यांच्या कडून मिळालेल्या माहितीनुसार:
- वाऱ्याचा वेग अधिक: यंदाच्या पावसाचे मुख्य वैशिष्ट्य म्हणजे वाऱ्याचे प्रमाण नेहमीपेक्षा खूप अधिक होते, ज्यामुळे झाडांचे सगळ्यात जास्त नुकसान झाले आहे.
- एकाच दिवसात मोठी हानी: संपूर्ण वर्षात जेवढी झाडे पडतात, त्याच्या ५0 टक्के झाडे यंदा केवळ एकाच दिवसात कोसळली आहेत.
- एकूण जीवित व वित्तहानी: चालू पावसाळ्याच्या सुरुवातीलाच आतापर्यंत १२३८ झाडांच्या फांद्या पडल्याची नोंद झाली असून, झाड अंगावर पडल्यामुळे दोन दुर्दैवी व्यक्तींचा मृत्यू झाला आहे.
आपत्कालीन परिस्थिती निर्माण झाल्यानंतर महानगरपालिकेच्या आपत्ती व्यवस्थापन विभागाकडून नागरिकांना तात्काळ मदत आणि सेवा पुरवण्यात आल्याचेही प्रशासकीय अधिकाऱ्यांकडून सांगण्यात आले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:41 07-07-2026
