रत्नागिरी: महाराष्ट्र राज्य तंत्र शिक्षण मंडळ व स्किल ट्री कन्सलटिंग यांच्या संयुक्त विद्यमाने संचलित कौशल्य विकास केंद्र, रत्नागिरी येथे “चाट चॅम्पियन २०२६” ही एक अनोखी आणि चवदार पाककला स्पर्धा मोठ्या उत्साहात पार पडली. शनिवार, ४ जुलै रोजी आयोजित करण्यात आलेल्या या स्पर्धेत रत्नागिरी जिल्ह्यातील विविध भागांतून आलेल्या स्पर्धकांनी आपले कसब पणाला लावले होते. विशेष म्हणजे, सर्व वयोगटातील महिला आणि पुरुष स्पर्धकांनी या स्पर्धेत उत्स्फूर्त सहभाग नोंदवला.
Ratnagiri Chaat Champion Competition: प्रो-वेज रगडा पॅटीस ते दही भल्ला केक; नाविन्यपूर्ण रेसिपींचे सादरीकरण
स्पर्धेमध्ये सर्वच सहभागींनी “चाट चॅम्पियन” या मुख्य थीमचा आधार घेत अत्यंत नाविन्यपूर्ण आणि कल्पक अशा रेसिपी सादर केल्या. यामध्ये प्रामुख्याने:
- प्रो-वेज रगडा पॅटीस, न्युट्री नेस्ट चाट आणि चाट फालूदा.
- कटोरी चाट, पारंपारिक आलू टिक्की.
- दही भल्ला केक आणि ढोकळा चाट यांसारख्या चविष्ट, विलक्षण व आधुनिक फ्युजन रेसिपींचा समावेश होता.
या वेगवेगळ्या आणि चवदार चटपटीत पदार्थांमुळे स्पर्धेत कमालीची चुरस पाहायला मिळाली आणि उपस्थितांच्या जिभेचे चोचले पुरवले गेले.
परीक्षकांची लागली कसोटी; रश्मीन दुर्वे आणि विकी पवार यांनी केले परीक्षण
एकापेक्षा एक सरस रेसिपी सादर झाल्यामुळे विजेते निवडताना परीक्षकांची खऱ्या अर्थाने कसोटी लागली होती. या स्पर्धेसाठी परीक्षक (Judges) म्हणून रत्नागिरीतील खाद्य संस्कृती व हॉटेल व्यवसायातील प्रसिद्ध नाव, “कॅफे सुरस” तसेच “कॅफे फूड कल्चर”चे मालक श्री. रश्मीन दुर्वे व कौशल्य विकास केंद्राचे विकी पवार सर लाभले होते.
स्पर्धेच्या समारोप प्रसंगी बोलताना परीक्षकांनी सर्व स्पर्धकांना व्यावसायिक दृष्टिकोनातून महत्त्वाचे मार्गदर्शन केले. अशा वैशिष्ट्यपूर्ण खाद्यपदार्थांचे सादरीकरण केल्याबद्दल त्यांनी स्पर्धकांचे कौतुक केले व कौशल्य विकास केंद्राचे आभार मानले.
‘चाट चॅम्पियन’ स्पर्धेतील अंतिम विजेते खालीलप्रमाणे
सादर केलेल्या पदार्थांची चव, सादरीकरण आणि नाविन्यता या निकषांवर परीक्षकांनी अंतिम विजेत्यांची घोषणा केली:
- प्रथम क्रमांक: सौ. प्रांजली सनील डोंगरे (रेसिपी: न्यूट्रि नेस्ट चाट)
- द्वितीय क्रमांक: सौ. मिहिका मंगेश कार्लेकर (रेसिपी: प्रो-व्हेज रगडा पॅटिस)
- तृतीय क्रमांक: सौ. विधी वैभव गांगण (रेसिपी: चाट फालुदा)
- उत्तेजनार्थ पारितोषिक: सौ. सिद्धी संभाजी देसाई (रेसिपी: वरी कटोरी चाट)
‘रत्नागिरी खबरदार’चे मीडिया पार्टनर म्हणून विशेष सहकार्य
या संपूर्ण स्पर्धेसाठी प्रादेशिक पातळीवर आघाडीवर असलेल्या “रत्नागिरी खबरदार”चे संपादक श्री. हेमंत वणजू यांचे ‘मीडिया पार्टनर’ म्हणून विशेष सहकार्य लाभले. स्पर्धा यशस्वी करण्यासाठी कौशल्य विकास केंद्राचे प्रिन्सिपल श्री. आदिश मेहता सर यांच्या मार्गदर्शनाखाली संपूर्ण कर्मचारी वर्गाने विशेष मेहनत घेतली.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:33 07-07-2026
