◼️ अभिजीत दिपके यांच्या नेतृत्वात आज दिल्लीत शक्तीप्रदर्शन; परीक्षांमधील गैरव्यवहार आणि घोटाळ्यांच्या मुद्द्यावरून विद्यार्थी आक्रमक
नवी दिल्ली: Cockroach Janta Party अर्थात ‘कॉकरोच जनता पार्टी’च्या दिल्लीतील जंतरमंतर येथील प्रस्तावित आंदोलनाला अखेर दिल्ली पोलिसांनी अधिकृत परवानगी दिली आहे. सोशल मीडिया प्लॅटफॉर्मवर प्रचंड सक्रिय असलेल्या या संघटनेचे संस्थापक अभिजीत दिपके नुकतेच अमेरिकेतून भारतात दाखल झाले असून, त्यांच्या आगमनासोबतच संघटनेच्या आंदोलनाला परवानगी मिळणे हे पहिले मोठे यश मानले जात आहे. दिल्ली पोलिसांच्या आदेशानुसार ६ जून (शनिवार) रोजी सकाळी १० ते सायंकाळी ५ वाजेपर्यंत जंतरमंतर येथे या आंदोलनाचे आयोजन करण्यात आले आहे. पोलिसांकडून अधिकृत मंजुरी मिळाल्यानंतर अभिजीत दिपके यांनी स्वतः ट्विट (Tweet) करून आपल्या समर्थकांना जंतरमंतरवर एकत्र येण्याचे आवाहन केले आहे.
डॉ. बाबासाहेब आंबेडकरांचे पुस्तक घेऊन अभिजीत दिपके भारतात दाखल
कॉकरोच जनता पार्टीचे प्रमुख अभिजीत दिपके हे अमेरिकेतून थेट दिल्ली आंतरराष्ट्रीय विमानतळावर उतरले. त्यांच्या स्वागतासाठी विमानतळ परिसरात समर्थकांनी मोठी गर्दी केली होती. विशेष म्हणजे, विमानतळावरून बाहेर येताना अभिजीत दिपके यांच्या हातात भारतरत्न डॉ. बाबासाहेब आंबेडकरांचे पुस्तक होते, जे सर्वांचे लक्ष वेधून घेत होते. विमानतळ परिसरातून दिल्ली पोलिसांच्या कड्या सुरक्षेत ते एका खाजगी वाहनाने पुढील प्रवासासाठी रवाना झाले.
समर्थकांना आणि विद्यार्थ्यांना शांततेचे आवाहन
आंदोलनाची कायदेशीर परवानगी मिळाल्यानंतर अभिजीत दिपके यांनी आपल्या कार्यकर्त्यांना आणि समर्थकांना शांतता राखण्याचे आवाहन केले आहे. “सर्व समर्थकांनी संसद मार्ग पोलीस ठाण्यात न जाता थेट जंतरमंतरवर पोहोचावे. तेथे सकाळी १० वाजल्यापासून आपले शांततापूर्ण आंदोलन सुरू होईल. सर्व समर्थकांनी आणि विद्यार्थ्यांनी मोठ्या संख्येने उपस्थित राहून आपल्या मागण्या लोकशाही आणि शांततापूर्ण मार्गाने मांडाव्यात,” असे आवाहन दिपके यांनी केले आहे.
केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी
देशातील विविध परीक्षांमध्ये झालेल्या गैरव्यवहार आणि कथित घोटाळ्यांच्या मुद्द्यावरून कॉकरोच जनता पार्टीने केंद्र सरकारविरोधात आक्रमक पवित्रा घेतला आहे. केंद्रीय शिक्षणमंत्री धर्मेंद्र प्रधान यांनी आपल्या पदाचा राजीनामा द्यावा, ही या आंदोलनाची मुख्य मागणी आहे. देशातील शिक्षण व्यवस्थेतील त्रुटी सुधारण्यासाठी आणि विद्यार्थ्यांच्या हक्कांचे रक्षण करण्यासाठी हे आंदोलन पुकारण्यात आल्याचे संघटनेकडून सांगण्यात आले आहे.
सुरक्षेचा कडक बंदोबस्त: नवी दिल्ली १२ झोनमध्ये विभागली
या आंदोलनाच्या पार्श्वभूमीवर देशाच्या राजधानीतील सुरक्षा यंत्रणा कमालीच्या सतर्क झाल्या आहेत. देशभरातून मोठ्या संख्येने विद्यार्थी आणि कोचिंग क्लासशी संबंधित नागरिक दिल्लीत दाखल होण्याची शक्यता असल्याने पोलिसांनी चोख व्यवस्था ठेवली आहे. सुरक्षेचे गांभीर्य लक्षात घेऊन नवी दिल्ली जिल्ह्याची १२ झोनमध्ये विभागणी करण्यात आली आहे. संसद मार्ग, जंतरमंतर आणि इतर संवेदनशील भागांत २,००० हून अधिक दिल्ली पोलीस आणि निमलष्करी दलाचे जवान तैनात करण्यात आले आहेत.
तसेच खबरदारीचा उपाय म्हणून पंतप्रधान नरेंद्र मोदी, गृहमंत्री अमित शाह आणि शिक्षणमंत्री धर्मेंद्र प्रधान यांच्या निवासस्थानाबाहेर सुरक्षा व्यवस्था अत्यंत कडक करण्यात आली आहे. जंतरमंतरकडे जाणाऱ्या प्रमुख रस्त्यांवर पोलिसांनी बॅरिकेडिंग केले असून, वाहनांची कसून तपासणी केल्यानंतरच त्यांना पुढे सोडले जात आहे. पोलिसांकडून मिळालेल्या परवानगीमुळे आता या आंदोलनाकडे संपूर्ण देशाचे लक्ष लागले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:40 06-06-2026
