शोकप्रस्तावात ‘दीनानाथ’ ऐवजी ‘दीनदयाल’ मंगेशकर उच्चारल्याने मनसे प्रमुख संतापले; फडणवीस-शिंदेंवरही डागली तोफ
मुंबई: ‘Raj Thackeray On Rahul Narwekar’ या मुद्द्यावरून महाराष्ट्राच्या राजकीय आणि सांस्कृतिक वर्तुळात एकच खळबळ उडाली आहे. गानसम्राज्ञी पद्मविभूषण आशाताई भोसले यांच्या निधनानंतर विधिमंडळाच्या चालू अधिवेशनात त्यांच्या निधनाचा शोकप्रस्ताव मांडण्यात आला. मात्र, हा शोकप्रस्ताव वाचताना विधानसभा अध्यक्ष राहुल नार्वेकर यांच्याकडून झालेल्या अक्षम्य चुका आणि मराठी भाषेच्या चुकीच्या उच्चारांवरून महाराष्ट्र नवनिर्माण सेनेचे अध्यक्ष राज ठाकरे यांनी अत्यंत तीव्र शब्दांत संताप व्यक्त केला आहे. “विधानसभा अध्यक्षांनी ज्या पद्धतीने मराठी भाषेची चिरफाड केली आणि कागदावर लिहून दिलेलं मराठी पण त्यांना वाचता आलं नाही, हे पाहून संताप आणि उद्वेग दोन्ही दाटून आला. वाचण्याआधी त्या कागदातून भेळ खाल्ली होती का यांनी?” अशा अत्यंत खोचक आणि तिखट शब्दांत राज ठाकरेंनी नार्वेकरांवर हल्लाबोल केला.
“दीनानाथ मंगेशकरांचा उल्लेख ‘दीनदयाल’ केला तरी कोणी आक्षेप घेतला नाही”
राज ठाकरे यांनी सोशल मीडियाद्वारे आपली संतप्त प्रतिक्रिया मांडताना सभागृहातील एकूणच गंभीर परिस्थितीवर बोट ठेवले. ते म्हणाले, “आशाताईंच्या निधनाचा हा प्रस्ताव राहुल नार्वेकरांनी स्वाहिली अथवा हिब्रू भाषेत मांडला असता तरी चाललं असतं, कारण त्यांचं मराठी कोणाला कळलं नाही. बरं, सगळ्यात मोठी शोकांतिका म्हणजे नार्वेकर हे संगीतसूर्य दीनानाथ मंगेशकरांचा उल्लेख ‘दीनदयाल मंगेशकर’ करत होते आणि वाट्टेल तसं मराठी वाचत होते, तरीही सभागृहात उपस्थित असलेल्या एकाही आमदाराला आक्षेप नोंदवावासा वाटला नाही! नार्वेकरांना ना दीनानाथ मंगेशकर माहीत आहेत ना दीनदयाल उपाध्याय माहीत आहेत.” भाजपच्या ‘खोगीरभरती’मुळे त्यांची अवस्था ‘तेलही गेलं, तूपही गेलं, हाती आलं धुपाटणे’ अशी झाली आहे, असा टोला त्यांनी भाजपला लगावला.
देवेंद्र फडणवीस आणि एकनाथ शिंदेंवरही तिखट शब्दांत निशाणा
या प्रकरणावरून राज ठाकरेंनी राज्याच्या नेतृत्वावरही घणाघाती टीका केली.
- देवेंद्र फडणवीस यांच्यावर टीका: “सभागृहात देवेंद्र फडणवीस उपस्थित होते का माहीत नाही, पण असते तरी मला वाटत नाही त्यांना काही फरक पडला असेल. ‘गुलाबी आंखे…’ सारखी गाणी बेसुरात म्हणणाऱ्या फडणवीसांना आज आपल्या राज्यात विधानसभेत कोणत्या महान व्यक्तीला आपण श्रद्धांजली अर्पण करणार आहोत आणि त्याचं गांभीर्य काय असतं हे समजायला हवं होतं. त्यांच्यासाठी सांगितलेली फोडाफोडीची कामे आणि अधिवेशनाचा उपचार पूर्ण होणे एवढेच महत्त्वाचे आहे. मग ‘दीनदयाल मंगेशकर’ म्हणो की ‘दीनानाथ चौहान’ काय फरक पडतो,” अशा शब्दांत राज यांनी खंत व्यक्त केली.
- एकनाथ शिंदे यांच्यावर टीका: “उपमुख्यमंत्री एकनाथ शिंदेंना पण याच्याशी घेणंदेणं असण्याचं काहीच कारण नाही. मराठी भाषेबद्दलच्या अभ्यासाचं त्यांचं विमान थेट ५० हजार फुटांवरून चाललंय, म्हणून त्यांचा पण दूरदूरपर्यंत संबंध नाही!” अशी बोचरी टीका राज यांनी शिंदेंवर केली.
“पुढच्या पिढ्या हे रेकॉर्डेड भाषण पाहतील याचं भान नाही?”
महाराष्ट्राचे वैभव असलेल्या मंगेशकर आणि भोसले कुटुंबाच्या शोकप्रस्तावावेळी झालेल्या या अक्षम्य चुकीबद्दल राज ठाकरेंनी तीव्र चिंता व्यक्त केली. “माणूस शिक्षित असला पाहिजे, पण त्यापेक्षा तो सुज्ञ असला पाहिजे याची जाणीव मुख्यमंत्री सभापतींना करून देणार आहेत का नाही? महाराष्ट्र विधानसभेच्या अध्यक्षाला समोरच्या कागदावर लिहिलेलं मराठी वाचता येत नाही, ते सभागृह मराठी भाषेविषयी काय आस्था बाळगणार?” असा थेट सवाल उपस्थित करत राज ठाकरेंनी संपूर्ण प्रकरणावर तीव्र संताप, उद्वेग आणि दुःख व्यक्त केले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:24 23-06-2026
