सावंतवाडी-दिवा पॅसेंजरमध्ये चढताना पाय घसरून फलाटाच्या पोकळीत कोसळला; ३३ वर्षीय तरुणाचा उपचारादरम्यान मृत्यू
संगमेश्वर:
Sangameshwar Railway Accident: मुंबई येथे नोकरीसाठी जाण्यासाठी घराबाहेर पडलेल्या एका तरुणाचा रेल्वे स्थानकावर धावती ट्रेन पकडताना झालेल्या भीषण अपघातात दुर्दैवी अंत झाला आहे. गुरुवार, २ जुलै रोजी संगमेश्वर रोड रेल्वे स्थानकावर सावंतवाडी-दिवा पॅसेंजरमध्ये चढत असताना अचानक पाय घसरल्याने हा अपघात घडला. फलाट आणि धावत्या गाडीच्या मधल्या अरुंद पोकळीत कोसळल्यामुळे अनिल बाळू बांबाडे (वय ३३, रा. शेंबवणे गोमाणेवाडी, ता. संगमेश्वर) हा तरुण गंभीर जखमी झाला होता. त्याला तातडीने ग्रामीण रुग्णालयात दाखल करण्यात आले, मात्र उपचारादरम्यान त्याची प्राणज्योत मालवली.
फलाट क्रमांक १ वर घडला थरार
रेल्वे पोलिसांकडून प्राप्त झालेल्या माहितीनुसार, गुरुवारी दुपारी १.४० वाजण्याच्या सुमारास संगमेश्वर रोड रेल्वे स्थानकाच्या फलाट क्रमांक १ वर गाडी क्रमांक १०१०६ सावंतवाडी – दिवा एक्सप्रेस आली होती. मुंबईच्या दिशेने नोकरीसाठी निघालेला अनिल बांबाडे हा या गाडीत चढण्याचा प्रयत्न करत असताना अचानक त्याचा पाय घसरला आणि तो थेट फलाट व धावत्या गाडीच्या मधील मोकळ्या जागेत पडला. हा अत्यंत भीषण थरार पाहून स्थानकावर उपस्थित असलेल्या इतर प्रवाशांमध्ये भीतीचे वातावरण निर्माण झाले होते.
रेल्वे पोलिसांची तत्परता, मात्र उपचार अपुरे
अपघात घडताच रेल्वे स्थानकावर कर्तव्यावर तैनात असलेले पोलीस शिपाई बुरकुले यांनी अत्यंत तत्परता आणि संवेदनशीलता दाखवली. त्यांनी वेळ न दवडता तात्काळ स्टेशन मास्तर यांच्याकडून लेखी मेमो घेतला आणि एका खाजगी रिक्षाच्या सहाय्याने रक्ताच्या थारोळ्यात पडलेल्या अनिलला तातडीने संगमेश्वर ग्रामीण रुग्णालयात नेले. रुग्णालयातील डॉक्टरांनी त्याचे प्राण वाचवण्याचे शर्थीचे प्रयत्न केले. मात्र, शरीराला गंभीर दुखापत झाल्यामुळे अखेर दुपारी ३.४० वाजता उपचारादरम्यान त्याचा मृत्यू झाल्याचे डॉक्टरांनी घोषित केले.
शेंबवणे गावावर शोककळा; अकस्मात मृत्यूची नोंद
या दुर्दैवी घटनेची माहिती मिळताच रत्नागिरी रेल्वे पोलीस ठाण्याचे पोलीस उपनिरीक्षक नवघरे यांनी घटनास्थळी व रुग्णालयात धाव घेऊन मृतदेहाचा इनक्वेस्ट पंचनामा केला. मृत अनिल हा एका खाजगी कंपनीत नोकरीला होता आणि त्याच्या अचानक जाण्याने बांबाडे कुटुंबाचा मुख्य आर्थिक आणि कौटुंबिक आधार हिरावला गेला आहे. या प्रकरणी सध्या रत्नागिरी रेल्वे पोलीस ठाण्यात अकस्मात मृत्यूची नोंद करण्यात आली आहे. ग्रामीण रुग्णालयात शवविच्छेदन (Post-Mortem) झाल्यानंतर अनिलचा मृतदेह अंत्यविधीसाठी त्याच्या अश्रूभऱ्या डोळ्यांनी वाट पाहणाऱ्या कुटुंबीयांच्या ताब्यात देण्यात आला. या हृदयद्रावक घटनेमुळे संपूर्ण शेंबवणे गावावर शोककळा पसरली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:37 04-07-2026
