खेड: रत्नागिरी जिल्ह्यात सुरू असलेल्या मुसळधार पावसामुळे खेड तालुक्याला पुराचा सर्वाधिक फटका बसला आहे. तालुक्यातील जीवनवाहिनी असलेली जगबुडी नदी अद्यापही धोक्याच्या पातळीवरून वाहत आहे. त्यामुळे खेडची मुख्य बाजारपेठ तब्बल १५ तासांहून अधिक काळ पूरपाण्याखाली बुडाली होती. बाजारपेठेतील अनेक दुकानांमध्ये पाणी शिरून ती पूर्णपणे जलमय झाल्यामुळे व्यापाऱ्यांचे लाखो रुपयांचे मोठे नुकसान झाले आहे.
Khed Market Flood Updates: निवाचा चौक अद्यापही पाण्याखाली; खेड-दापोली मार्ग ठप्प
मुसळधार पावसाचा जोर ओसरला असला, तरी खेड शहरातील सखल भागातील पूर ओसरलेला नाही. शहरातील मुख्य केंद्र असलेल्या निवाचा चौक परिसरात अजूनही मोठ्या प्रमाणावर पाणी साचून राहिले आहे. पूरपरिस्थिती आणि पाण्याचा प्रवाह लक्षात घेता, सुरक्षेच्या कारणास्तव खेड शहराचा वीजपुरवठा प्रशासनाने पूर्णपणे बंद ठेवला आहे. परिणामी, संपूर्ण शहर अंधारात बुडाले आहे. वाहतुकीचा विचार केला तर, खेड-दापोली मार्गावर पुराचे पाणी आल्याने या मार्गावरील वाहतूक पूर्णपणे बंद करण्यात आली असून, यामुळे प्रवाशांची आणि स्थानिक नागरिकांची मोठी गैरसोय होत आहे.
युद्धपातळीवर बचावकार्य; सामाजिक संस्थांकडून पूरग्रस्तांना मदतीचा हात
खेडमधील भीषण परिस्थिती पाहता स्थानिक प्रशासन, पोलीस दल आणि आपत्ती व्यवस्थापन यंत्रणा पूर्ण क्षमतेने मैदान उतरली असून, बचाव व मदतकार्यात गुंतली आहे. पूरग्रस्तांना सुरक्षित स्थळी हलवण्यासोबतच त्यांच्या प्राथमिक गरजा पूर्ण करण्याचे काम सुरू आहे.
या कठीण प्रसंगात खेडमधील विविध सामाजिक संस्थांनी पुढाकार घेतला आहे. प्रशासनाला सहकार्य करत या संस्थांच्या माध्यमातून पूरग्रस्त नागरिकांना आणि व्यापाऱ्यांना अन्न पाकिटे, पिण्याचे शुद्ध पाणी आणि आवश्यक औषधांचे तातडीने वितरण केले जात आहे. जगबुडी नदीची पाणी पातळी संथ गतीने ओसरत असली, तरी नागरिकांनी प्रशासकीय सूचनांचे पालन करावे, असे आवाहन करण्यात आले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:46 07-07-2026
