नाल्याला आले पिवळसर-लालसर रंग; ‘एमपीसीबी’च्या कार्यक्षमतेवर स्थानिक नागरिकांचे आक्षेप
चिपळूण:
Songaon Chemical Pollution (सोनगाव रासायनिक प्रदूषण) प्रकरणाने लोटे एमआयडीसी परिसरातील औद्योगिक प्रदूषणाचा गंभीर प्रश्न पुन्हा एकदा समोर आणला आहे. खेड तालुक्यातील सोनगाव परिसरातील नाल्यात १२ जुलै रोजी दुपारच्या सुमारास तीव्र पिवळसर आणि लालसर रंगाचे रसायनमिश्रित औद्योगिक सांडपाणी उघड्यावर वाहत असल्याचा धक्कादायक प्रकार उघडकीस आला आहे. या बेजबाबदार प्रदूषणामुळे स्थानिक ग्रामस्थ, मच्छीमार आणि पर्यावरणप्रेमींमध्ये तीव्र नाराजी असून, महाराष्ट्र प्रदूषण नियंत्रण मंडळाच्या (एमपीसीबी) प्रत्यक्ष कार्यक्षमतेवर आणि भूमिकेवर गंभीर प्रश्नचिन्ह निर्माण झाले आहे, अशी माहिती समोर आली आहे.
पर्यावरण समितीकडून घटनास्थळाची पाहणी व सॅम्पल गोळा
या गंभीर घटनेची माहिती मिळताच कोकण पर्यावरण संरक्षण संघर्ष समितीचे समन्वयक भरत लब्धे व तुळशीराम पवार यांनी तात्काळ सोनगाव येथील घटनास्थळी धाव घेतली. त्यांनी नाल्यात वाहणाऱ्या दूषित आणि रासायनिक पाण्याचे प्रत्यक्ष निरीक्षण करून प्रयोगशाळा चाचणीसाठी त्याचे नमुने (सॅम्पल्स) गोळा केले आहेत. या पाहणीदरम्यान त्यांनी स्थानिक ग्रामस्थ आणि मच्छीमारांशी सविस्तर चर्चा करून त्यांच्या तक्रारी व अडचणी जाणून घेतल्या.
मत्स्यसंपत्ती धोक्यात; ठोस कारवाईचा अभाव
स्थानिक ग्रामस्थांनी दिलेल्या माहितीनुसार, लोटे एमआयडीसीमधील काही विशिष्ट रासायनिक उद्योगांकडून कोणतीही प्रक्रिया न करता वारंवार अशा प्रकारे घातक दूषित सांडपाणी नाल्यांमध्ये सोडले जाते. हे पाणी पुढे मुख्य नदीला मिळत असल्याने नदीच्या पाण्याचे प्रदूषण कमालीचे वाढत असून स्थानिक मत्स्यसंपत्तीवर याचा अत्यंत विपरीत परिणाम होत आहे. या संदर्भात यापूर्वी अनेकदा संबंधित शासकीय यंत्रणांकडे रीतसर तक्रारी करूनही कोणतीही ठोस किंवा कायमस्वरूपी कारवाई होत नसल्याने नागरिकांमध्ये प्रशासनाविरोधात कमालीची नाराजी पसरली आहे.
प्रदूषण नियंत्रण मंडळाला दिला व्हिडिओ पुरावा
सोनगाव येथील या प्रत्यक्ष पाहणीच्या वेळी गावाच्या सरपंच भारती पडवळ, मच्छीमार नेते दिलीप दिवेकर, मंगेेश कासेकर, प्रकाश दिवेकर, स्वप्निल पडवळ, विनायक कासेकर यांच्यासह मोठी संख्या स्थानिक ग्रामस्थ उपस्थित होते. या सर्वांनी प्रदूषण करणाऱ्या उद्योगांवर कठोर कायदेशीर कारवाई करण्याची मागणी लावून धरली.
दरम्यान, सोमवार, १३ जुलै रोजी दुपारी सुमारे १२.३५ वाजता समन्वयक भरत लब्धे यांनी महाराष्ट्र प्रदूषण नियंत्रण मंडळाच्या (MPCB) चिपळूण येथील प्रादेशिक अधिकारी कुलकर्णी यांच्याशी दूरध्वनीवरून थेट संपर्क साधला आणि संपूर्ण घटनेची वस्तुस्थिती त्यांच्या कानावर घातली. यासोबतच घटनास्थळाचा प्रत्यक्ष व्हिडिओ आणि प्राथमिक माहितीही त्यांना पुराव्या दाखल पाठविण्यात आली आहे. यावर संबंधित अधिकाऱ्यांनी तातडीने दखल घेत सोनगाव व लोटे एमआयडीसी परिसराची विशेष पाहणी करण्याचे आणि दूषित पाणी सोडणाऱ्या कारखान्यांचा शोध घेण्याचे आश्वासन दिले असून, ‘एमपीसीबी’चे पथक लवकरच घटनास्थळाची पाहणी करणार असल्याची माहिती दिली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:47 14-07-2026
