नवी दिल्लीत नीट (NEET) पेपरफुटी प्रकरणी केंद्रीय शिक्षणमंत्र्यांनी तातडीने राजीनामा द्यावा, या प्रमुख मागणीसाठी सुरू असलेल्या कॉकरोच जनता पार्टीच्या (CJP) आंदोलनाने आता अत्यंत रौद्र रूप धारण केले आहे. जंतरमंतरवर आंदोलकांवर झालेल्या लाठीचार्ज आणि अश्रूधुराच्या नळकांड्यांच्या वापरानंतर आंदोलक आक्रमक झाले. या घडामोडींवर ठाकरेंच्या शिवसेनेचे खासदार संजय राऊत यांनी केंद्र सरकार आणि सरन्यायाधीशांवर तीव्र शब्दांत निशाणा साधला आहे.
संजय राऊत यांचा टोला: ‘मेलेल्यांना जिवंत केल्याबद्दल आभार’
नवी दिल्लीत पेटलेल्या या आंदोलनावरून संजय राऊत यांनी सरन्यायाधीश सूर्यकांत यांच्यावर उपरोधिक टीका केली. “नवी दिल्लीत जे आंदोलन पेटले आहे, त्याचे श्रेय फक्त सरन्यायाधीश सूर्यकांत यांनाच जाते. त्यांनी देशातील मेलेल्यांना जिवंत केल्याबद्दल त्यांचे आभार,” अशा अत्यंत खरमरीत शब्दांत राऊतांनी केंद्र सरकारसह सर्वोच्च न्यायालयाच्या भूमिकेवर टोला लगावला आहे.
संसदेच्या पावसाळी अधिवेशनादरम्यान सुरक्षा यंत्रणांची धावपळ
आजपासून संसदेचे पावसाळी अधिवेशन सुरू होत असतानाच दिल्लीत सुरक्षेचा मोठा प्रश्न निर्माण झाला आहे. ज्येष्ठ वकील प्रशांत भूषण यांच्या दाव्यानुसार, संसद भवन परिसरात जवळपास ७५,००० आंदोलक जमले होते. या प्रचंड जनसमुदायामुळे सुरक्षा यंत्रणांची मोठी धावपळ उडाली. पोलिसांनी संसदेकडे जाणारे रस्ते बॅरिकेड्स लावून बंद केले असले, तरी काही आंदोलक त्यावरून चढून पुढे जाण्याचा प्रयत्न करत होते. जमावाला पांगवण्यासाठी पोलिसांनी पुन्हा एकदा अश्रूधुराच्या नळकांड्या फोडल्या.
1
सोनम वांगचुक यांना रुग्णालयात हलवले
आंदोलनाचे नेतृत्व करणारे सोनम वांगचुक यांना केंद्र सरकारने जबरदस्तीने उचलून रुग्णालयात दाखल केले.
2
लाठीचार्ज अन् अश्रूधूर
जंतरमंतरवर आंदोलन करणाऱ्या अभिजीत दिपके व समर्थकांवर सौम्य लाठीचार्ज करण्यात आला व अश्रूधुराच्या नळकांड्या फोडण्यात आल्या.
3
अभिजीत दिपके यांना ताब्यात घेतले
सीजेपीने दिलेल्या माहितीनुसार, जंतरमंतरवर उपस्थित असलेल्या अभिजीत दिपके यांना पोलिसांनी ताब्यात घेतले आहे.
4
संसदेजवळ आंदोलकांची धडक
सुमारे ७५ हजार आंदोलकांनी संसदेपासून अवघ्या १५० मीटर अंतरावर पोहोचून जोरदार निदर्शने सुरू केली.
जे. पी. नड्डा यांच्याशी चर्चेनंतर सौरव दास यांची पोस्ट
दरम्यान, या तणावाच्या पार्श्वभूमीवर केंद्रीय मंत्री जे. पी. नड्डा यांनी आंदोलकांच्या प्रतिनिधींशी भेट घेतली. या भेटीनंतर ‘सीजेपी’चे प्रवक्ते सौरव दास यांनी ‘एक्स’ (ट्विटर) वर माहिती शेअर केली. “मी आणि आशुतोष रांका यांनी सुमारे २ तास वाट पाहिल्यानंतर केंद्रीय मंत्री जे. पी. नड्डा यांची १० मिनिटे भेट घेतली. आम्ही आमच्या सर्व मागण्यांचे पत्र त्यांना लेखी स्वरूपात दिले असून त्यांनी पुढील चर्चेचे आश्वासन दिले आहे. आपण त्याच प्रक्रियेत आहोत, मात्र दुसरीकडे मोठ्या प्रमाणात आंदोलकांना पोलिसांनी ताब्यात घेतल्याच्या बातम्या समोर येत आहेत,” असे दास यांनी नमूद केले.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
09:58 21-07-2026
