दुसरी यादी २ आठवड्यांत जाहीर होणार; कर्जमाफीची संपूर्ण प्रक्रिया पुढील महिन्यात पूर्ण करण्याचे उद्दिष्ट
पुणे : Pune Farmers Debt Waiver Scheme संदर्भात राज्य शासनाच्या सहकार विभागाने एक अत्यंत महत्त्वपूर्ण अपडेट दिली आहे. राज्य सरकारच्या ‘पुण्यश्लोक अहिल्यादेवी होळकर कर्जमुक्ती योजने’च्या पहिल्या यादीची अधिकृत घोषणा सहकार आयुक्त दीपक तावरे यांनी केली असून, राज्यातील १६ लाख ९६ हजार शेतकऱ्यांना एकूण १३ हजार ६०० कोटी रुपयांच्या कर्जमाफीचा थेट लाभ मिळाला आहे. या योजनेद्वारे राज्यातील सुमारे ५६ लाख शेतकऱ्यांना टप्प्याटप्प्याने कर्जमुक्त करण्याचे उद्दिष्ट असून, त्यासाठी एकूण ३६ हजार ५८५ कोटी रुपयांच्या निधीची आवश्यकता आहे. राज्य सरकारने नुकत्याच झालेल्या पावसाळी अधिवेशनात या योजनेसाठी २० हजार कोटींची तरतूद केली आहे.
अहिल्यानगर जिल्ह्यात सर्वाधिक तर सिंधुदुर्गात सर्वात कमी लाभार्थी
सहकार आयुक्त दीपक तावरे यांनी दिलेल्या माहितीनुसार, राज्यातील ६ जिल्ह्यांमध्ये प्रत्येकी १ लाखापेक्षा जास्त शेतकरी या पहिल्या टप्प्यात पात्र ठरले आहेत.
- अहिल्यानगर : सर्वाधिक १,३२,६३४ शेतकरी पात्र.
- जालना : १,६०,००० लाभार्थी.
- बुलढाणा : १,१६,००० लाभार्थी.
- छत्रपती संभाजीनगर : १,०५,००० लाभार्थी.
- यवतमाळ : १,०१,००० लाभार्थी.
- सिंधुदुर्ग : सर्वात कमी ३,७०८ शेतकऱ्यांना लाभ मिळाला आहे.
पुढील दोन आठवड्यांत कर्जमुक्तीची दुसरी यादी जाहीर केली जाणार असून, संपूर्ण कर्जमाफीची प्रक्रिया पुढील महिन्यात पूर्ण होणार असल्याचे तावरे यांनी स्पष्ट केले.
शेतकऱ्यांना लवकरच मिळणार ‘कर्ज नील’ दाखला : कृषीमंत्री दत्तात्रय भरणे
कृषीमंत्री दत्तात्रय भरणे यांनी सांगितले की, २ लाख रुपयांपर्यंतचे सरसकट कर्ज माफ करण्यात येत असून, पात्र शेतकऱ्यांना लवकरच लोकप्रतिनिधी (आमदार, खासदार व मंत्री) यांच्या हस्ते ‘कर्ज नील’ (Debt Free Certificate) दाखले दिले जातील. २ लाखांच्या आत कर्ज असणाऱ्या शेतकऱ्यांनी आता बँकेत पैसे भरण्याची गरज नाही आणि बँकांनाही त्यांना त्रास देता येणार नाही, असा दिलासा त्यांनी दिला. तसेच २ लाखांपेक्षा जास्त कर्ज असणाऱ्यांना वरची रक्कम भरण्यासाठी मुदत देण्यात आली आहे.
यादीतील गोंधळाबाबत कृषीमंत्र्यांचे स्पष्टीकरण आणि आवाहन
धाराशिव जिल्ह्यातील गंधोरा गावातील ग्रामस्थांनी कर्जमाफीच्या यादीत ८०% शेतकऱ्यांच्या रकमेत गोंधळ असल्याचा आरोप केला आहे. यावर बोलताना कृषीमंत्री भरणे म्हणाले की, “जर कोणाला कर्जमुक्ती नाकारली गेली असेल तर कागदपत्रांची त्रुटी असू शकते. अद्याप इतर याद्या जाहीर होणे बाकी आहे, त्यामुळे कोणत्याही शेतकऱ्याने टोकाचे पाऊल उचलू नये.”
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:31 29-07-2026
