जिल्ह्यातील बंदरांवर पुन्हा गजबज; अवैध मासेमारी रोखण्यासाठी ‘शारदा’ गस्ती नौका सज्ज, पण मत्स्य व्यवसाय विभागात कर्मचाऱ्यांचा तुटवडा
Ratnagiri Fishing Season News अंतर्गत रत्नागिरी जिल्ह्यातील सागरी मासेमारीचा पावसाळी बंदी कालावधी संपुष्टात आला असून, रविवारपासून समुद्रात मासेमारी पूर्ववत सुरू होत आहे. स्थानिक अर्थव्यवस्थेला मोठी चालना देणारा हा मत्स्यव्यवसाय पुन्हा गती घेत असल्याने जिल्ह्यातील सर्वच मासेमारी बंदरांवर लगबग आणि रेलचेल पाहायला मिळणार आहे. दरम्यान, समुद्रातील बेकायदेशीर मासेमारीवर कडक कारवाई करण्यासाठी मत्स्य व्यवसाय विभागाची ‘शारदा’ ही गस्ती नौका सज्ज करण्यात आली आहे.
रत्नागिरी जिल्ह्यात एकूण सुमारे ३ हजार मासेमारी नौका नोंदणीकृत असून, त्यांपैकी २ हजार ५०० पेक्षा जास्त यांत्रिक नौका आहेत. या यांत्रिक नौकांसह इतर सर्व प्रकारच्या नौकांना रविवारपासून समुद्रात जाण्यास परवानगी मिळाली आहे. गेल्या वर्षापर्यंत १ ऑगस्टपासूनच मासेमारी सुरू केली जात होती. मात्र, यंदा पावसाळी मासेमारी बंदीचा हा कालावधी १५ ऑगस्टपर्यंत वाढवण्यात आला होता. या कालावधीत १ ऑगस्टपासून एकही नौका समुद्रात जाऊ नये, यासाठी सहाय्यक मत्स्य व्यवसाय विभागाने विशेष दक्षता घेतली होती, तसेच समुद्रातील हवामानही धोकादायक असल्याने यांत्रिक नौका बंदरातच नांगरून होत्या.
Ratnagiri Fishing Season News: मत्स्य व्यवसाय विभागात अधिकाऱ्यांची पदे रिक्त; परसायनेट मासेमारी १ सप्टेंबरनंतर पूर्ण क्षमतेने
एकीकडे नवीन हंगाम सुरू होत असताना दुसरीकडे मत्स्य व्यवसाय विभागातील मनुष्यबळाचा तुटवडा चिंतेचा विषय ठरत आहे. विभागातील ४ अधिकाऱ्यांच्या बदल्या झाल्या असून त्यांच्या जागी अद्याप नवीन अधिकाऱ्यांची नियुक्ती झालेली नाही. तांत्रिक कर्मचारी आणि परवाना अधिकारी कमी असल्याने उपलब्ध अधिकाऱ्यांवर एकापेक्षा जास्त बंदरांचा आणि कार्यालयीन कामाचा अतिरिक्त ताण आला आहे. अशा अपुऱ्या कर्मचारी वर्गाच्या बळावर बेकायदेशीर मासेमारीवर नियंत्रण ठेवताना प्रशासनाला मोठी कसरत करावी लागणार आहे.
दरम्यान, ज्या परसायनेट मासेमारी नौकांना राज्याच्या समुद्र क्षेत्राबाहेर मासेमारी करण्यासाठी ‘ॲक्सेस पास’ मिळालेला आहे, त्यांना १ ऑगस्टपासूनच मासेमारीची मुभा आहे. मात्र, संपूर्ण क्षमतेने परसायनेट मासेमारी ही १ सप्टेंबरनंतरच सुरू होणार असल्याचे मत्स्य व्यवसाय विभागाकडून स्पष्ट करण्यात आले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:14 15-08-2026
