पंचायतीच्या निधी वाटपात मनमानी आणि लोकसंख्येच्या निकषांकडे दुर्लक्ष; गटविकास अधिकारी राजकीय दबावाखाली असल्याचा गटनेते अजय चाळके यांचा आरोप
Khed Panchayat Samiti Fund Allegations: रत्नागिरी जिल्ह्यातील खेड पंचायत समितीच्या उपलब्ध निधीच्या विनियोगावरून सत्ताधारी सदस्यांवर मनमानी कारभाराचे गंभीर आरोप करण्यात आले आहेत. विकासकामांचे आराखडे तयार करताना लोकसंख्येचा विचार करण्यात आला नसून निधीचे असमान वाटप करण्यात आल्याचा दावा पंचायत समिती सदस्य व उद्धव बाळासाहेब ठाकरे शिवसेनेचे गटनेते अजय चाळके यांनी केला आहे. या प्रकरणी प्रशासनाकडून योग्य कारवाई न झाल्यास न्यायालयात दाद मागू, असा इशाराही त्यांनी दिला आहे.
खेड येथील शासकीय विश्रामगृहात १४ ऑगस्ट रोजी सायंकाळी ५ वाजता आयोजित करण्यात आलेल्या पत्रकार परिषदेत अजय चाळके यांच्यासह पंचायत समिती सदस्या अमिता बडे व रेवती धाग यांनी पंचायत समितीच्या कारभारावर जोरदार हल्लाबोल केला. चाळके यांनी दिलेल्या माहितीनुसार, पंचायत समितीत निवडून आल्यानंतर आतापर्यंत पाच सभा झाल्या असून २४ जून रोजी पहिली सभा पार पडली होती. या सभेत उपलब्ध निधीतून सभापती व उपसभापती यांना पंचायत समितीकडे येणाऱ्या निधीतील ५० टक्के निधी देण्याचा प्रयत्न करण्यात आल्याचे त्यांनी सांगितले.
Khed Panchayat Samiti Fund Allegations: सेस फंड आणि १५ व्या वित्त आयोगाच्या निधीत मनमानीचा आरोप
पत्रकार परिषदेत बोलताना अजय चाळके म्हणाले की, सेस फंड आणि १५ व्या वित्त आयोगांतर्गत प्राप्त झालेल्या निधीच्या विनियोगासाठी आराखडे तयार करताना प्रचंड मनमानी करण्यात आली आहे. विकासकामांचे आराखडे निश्चित करताना लोकसंख्येच्या प्रमाणाचा विचार करणे कायदेशीर आणि नैतिकदृष्ट्या आवश्यक असतानाही त्याकडे पूर्णपणे दुर्लक्ष करण्यात आले आहे. सत्तेत असताना संविधानाच्या विरोधात ठराव करून जर निधीचा वापर केला जात असेल, तर ते अजिबात खपवून घेतले जाणार नाही.
या वेळी अजय चाळके यांनी खेडचे गटविकास अधिकारी (BDO) राजकीय पक्षाच्या दबावाखाली काम करत असल्याचा थेट आरोप केला. या संपूर्ण गैरप्रकाराबाबत रत्नागिरीचे जिल्हाधिकारी, जिल्हा परिषद मुख्य कार्यकारी अधिकारी (CEO) आणि इतर संबंधित वरिष्ठ अधिकाऱ्यांकडे अधिकृत तक्रारी दाखल करण्यात आल्याचे त्यांनी स्पष्ट केले. या पत्रकार परिषदेला उद्धव बाळासाहेब ठाकरे पक्षाचे तालुकाप्रमुख सचिन निकम, युवा सेना जिल्हाप्रमुख अजिंक्य मोरे, प्रकाश मोरे, राजू धाग, रोहित बने, राजन निर्मळ आदी पदाधिकारी व कार्यकर्ते उपस्थित होते.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:33 15-08-2026
