भरधाव वाहने आणि खड्ड्यांमुळे संतप्त ग्रामस्थांची कठोर कारवाईची मागणी
संगमेश्वर:
Sangameshwar Road Accident च्या घटनेने संगमेश्वर तालुक्यातील वाहतूक सुरक्षेचा प्रश्न पुन्हा एकदा समोर आला आहे. ताम्हाने-कोसुंब रस्त्यावर बुधवारी दुपारी दीड वाजण्याच्या सुमारास झालेल्या एका भीषण अपघातात आंबवली गावातील प्रतीक सावंत या तरुणाचा जागीच दुर्दैवी मृत्यू झाला. चिरे भरून भरधाव वेगाने जाणाऱ्या एका ट्रकने त्याच्या मोटारसायकलला थेट धडक दिल्याने हा अपघात घडला.
स्थानिकांकडून प्रशासकीय दुर्लक्षावर बोट
मिळालेल्या माहितीनुसार, अपघातग्रस्त ट्रक (MH- 07 -1170) हा महसूल विभागातून निवृत्त झालेल्या एका कर्मचाऱ्याच्या नातेवाईकाचा असल्याची प्राथमिक माहिती समोर आली आहे. या मार्गावर चिरे वाहून नेणाऱ्या ट्रकची सतत मोठी वाहतूक सुरू असते. मात्र, या वाहनांची आवश्यक कागदपत्रे, वाहनांची योग्यता (फिटनेस प्रमाणपत्र) आणि रस्त्यावरील त्यांचा अवाजवी वेग यावर प्रशासनाचा कोणताही अंकुश उरलेला नाही, असा थेट आरोप स्थानिक नागरिकांकडून केला जात आहे.
Sangameshwar Road Accident: खराब रस्ते आणि बेदरकार वाहतुकीमुळे नागरिक त्रस्त
रस्त्यावरील खड्ड्यांमुळे अपघातांचा धोका वाढला
ताम्हाने-कोसुंब रस्त्याची सध्या अत्यंत दुरवस्था झाली असून संपूर्ण रस्त्यावर खड्ड्यांचे साम्राज्य पसरले आहे. एकीकडे खराब रस्ते आणि दुसरीकडे कोणतीही भीती न बाळगता बेदरकारपणे धावणारी अवजड वाहने, यामुळे या मार्गावरून प्रवास करणाऱ्या सामान्य नागरिकांचा आणि वाहनधारकांचा जीव सातत्याने धोक्यात येत आहे.
दोषींवर तात्काळ कारवाई करण्याची आक्रमक मागणी
या दुर्दैवी घटनेनंतर परिसरातील ग्रामस्थ आणि प्रवाशांमध्ये प्रशासनाविरोधात तीव्र नाराजी पाहायला मिळत आहे. संबंधित निष्काळजी वाहनचालकावर आणि नियमबाह्य वाहतुकीवर प्रशासनाने तात्काळ कठोर पावले उचलावीत, तसेच दोषींवर कडक कायदेशीर कारवाई करावी, अशी आक्रमक मागणी स्थानिकांकडून केली जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:47 20-08-2026
