मनमानी कारभाराविरोधात प्रवाशांचा आंदोलनाचा इशारा
देवरुख :
Deorukh ST Depot AC Bus Failure संदर्भात एसटी महामंडळाच्या देवरुख आगाराचा बेजबाबदार आणि मनमानी कारभार पुन्हा एकदा चव्हाट्यावर आला आहे. वातानुकूलित (एसी) गाडीचे जादा भाडे उकळूनही प्रवाशांना भररस्त्यात ताटकळत ठेवणाऱ्या नादुरुस्त ‘हायफाय’ एसी बसने गुरुवारी सायंकाळी प्रवाशांची मोठी ताटकळ आणि हाल केले.
सायंकाळी ५.३० ची बस अर्ध्या तासातच बंद
मिळालेल्या माहितीनुसार, देवरुख आगारातून सायंकाळी ५.३० वाजता रत्नागिरीसाठी सुटलेली एसी बस अवघ्या अर्ध्या तासात, म्हणजेच सायंकाळी ६ वाजण्याच्या सुमारास आंबव कॉलेजजवळ पोहोचताच अचानक बंद पडली. सायंकाळच्या वेळी कामावरून घरी परतणारे नोकरदार वर्ग आणि विद्यार्थी यांची बस अचानक बंद पडल्यामुळे मोठी त्रेधा उडाली. प्रवाशांना भररस्त्यात ताटकळत राहावे लागले.
साध्या गाड्या रद्द करून महागड्या एसी गाड्यांची सक्ती
देवरुख आगाराकडून प्रवाशांच्या सोयीपेक्षा आर्थिक वसुलीवरच अधिक भर दिला जात असल्याचा आरोप प्रवाशांनी केला आहे. पूर्वसूचना न देता किंवा विचारणा न करता अचानक साध्या बसेस रद्द करून त्याऐवजी महागड्या एसी गाड्या मार्गावर ढकलल्या जातात. दुसरा पर्याय उपलब्ध नसल्यामुळे प्रवाशांना नाईलाजाने जादा तिकिटाचे दर मोजावे लागतात. मात्र, पूर्ण भाडे देऊनही गाड्यांची अवस्था भंगार असल्याने प्रवाशांना नाहक मानसिक व शारीरिक त्रास सहन करावा लागत आहे.
Deorukh ST Depot AC Bus Failure: वरिष्ठ प्रशासनाकडून कारवाईची मागणी
अधिकाऱ्यांवर कारवाई कधी?
प्रवाशांकडून पूर्ण पैसे उकळून त्यांना रस्त्यावर वाऱ्यावर सोडणाऱ्या देवरुख आगाराच्या जबाबदार अधिकाऱ्यांवर एसटी महामंडळाचे वरिष्ठ प्रशासन काय आणि कधी कारवाई करणार, असा थेट सवाल संतप्त प्रवाशांकडून विचारला जात आहे.
रस्त्यावर उतरण्याचा प्रवाशांचा इशारा
आगाराचा हा मनमानी आणि अवाजवी दर आकारणीचा कारभार तातडीने थांबला नाही, तर या धोरणाविरोधात प्रवाशांनी थेट रस्त्यावर उतरून तीव्र आंदोलन छेडण्याचा इशारा दिला आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:56 20-08-2026
