विधानसभा अध्यक्षांचा निर्णय चुकीचा; पक्षत्याग सिद्ध झाल्यास निवडणूक आयोगाच्या चिन्हाचा आधारच नष्ट होणार
नवी दिल्ली:
Shiv Sena Symbol Verdict Updates संदर्भात सर्वोच्च न्यायालयात सुरू असलेल्या सुनावणीदरम्यान ठाकरे गटाचे ज्येष्ठ वकील देवदत्त कामत यांनी अत्यंत महत्त्वाचा व आक्रमक युक्तिवाद केला आहे. शिवसेना फुटीनंतर एकनाथ शिंदे यांच्यासोबत गेलेल्या आमदारांना विधानसभा अध्यक्षांऐवजी (Rahul Narwekar) थेट सर्वोच्च न्यायालय अपात्र ठरू शकतं का? या न्यायालयाच्या प्रश्नावर उत्तर देताना कामत यांनी स्पष्ट केले की, असाधारण परिस्थितीत तांत्रिक चौकटीत न अडकता संपूर्ण न्यायासाठी (Substantive Justice) सर्वोच्च न्यायालय स्वतः आमदारांना अपात्र घोषित करू शकते.
पक्षांतराचे फायदे आजही उपभोगत असल्याचा दावा
देवदत्त कामत यांनी न्यायालयात मांडले की, ज्या दिवशी आमदारांनी पक्षांतराची कृती केली, त्याच दिवशी कायदेशीरदृष्ट्या त्यांचे सदस्यत्व संपले होते. मात्र, विधानसभा अध्यक्षांकडील विलंबाने झालेल्या सुनावणीमुळे त्यांनी पक्षांतराचे सर्व राजकीय लाभ उठवले आहेत. निवडणूक आयोगाने (Election Commission) दिलेले पक्षाचे नाव आणि चिन्ह हे केवळ विधिमंडळातील बहुमताच्या आधारे दिले आहे. जर न्यायालयाने या आमदारांचा पक्षत्याग सिद्ध केला, तर निवडणूक आयोगाच्या निर्णयाचा मुख्य आधारच नष्ट होईल, असे कामत म्हणाले.
‘राजेंद्र सिंह राणा’ खटल्याचा दिला महत्त्वाचा दाखला
अध्यक्षांच्या निर्णयाची वाट न पाहता न्यायालयाने स्वतः निर्णय घेण्याच्या अधिकाराबाबत वकील देवदत्त कामत यांनी विविध घटनात्मक दाखले दिले:
- राणा खटल्याचा संदर्भ: उत्तर प्रदेशातील ‘राजेंद्र सिंह राणा’ खटल्याचा दाखला देत त्यांनी सांगितले की, जेव्हा अध्यक्ष निर्णय घेण्यास टाळाटाळ करतात किंवा कार्यकाळ संपत आलेला असतो, तेव्हा सर्वोच्च न्यायालयाने स्वतः आमदारांना अपात्र ठरवले आहे.
- अध्यक्षांवरील अविश्वास: सुभाष देसाई प्रकरणातही अध्यक्षांवर विश्वास नसल्याने न्यायालयानेच निर्णय घ्यावा, अशी मागणी करण्यात आली होती.
- सर्व पक्षकार उपस्थित: आज सर्व पक्षकार आणि त्यांचे प्रतिनिधी न्यायालयासमोर उपस्थित असल्याने न्यायालयातच अपात्रतेच्या याचिकांवर अंतिम निर्णय घेतला जाऊ शकतो.
Shiv Sena Symbol Verdict Updates: सर्वोच्च न्यायालयाच्या निर्णयाकडे संपूर्ण महाराष्ट्राचे लक्ष
कायदेशीर निष्कर्षाची मागणी
जरी सध्याच्या स्थितीत प्रत्यक्ष दिलासा लागू करणे कठीण असले, तरी हे आमदार नेमक्या कोणत्या तारखेपासून अपात्र ठरतात, याबाबतचा कायदेशीर निष्कर्ष न्यायालयाने आज नोंदवावा, अशी ठाम मागणी ठाकरे गटाकडून करण्यात आली आहे. या युक्तिवादामुळे शिवसेनेच्या चिन्ह आणि अपात्रतेच्या वादाला पुन्हा एकदा मोठे वळण मिळाले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:29 20-08-2026
