करंबेळे शेवरवाडी येथील घटना; वनविभागाकडून ट्रॅप कॅमेरा तैनात
देवरूख:
Devrukh Leopard Attack Poultry Farm संदर्भात संगमेश्वर तालुक्यातून एक भीतीदायक घटना समोर आली आहे. देवरूखजवळील करंबेळे तर्फे संगमेश्वर शेवरवाडी येथे मंगळवारी पहाटे बिबट्याने एका कुक्कुटपालन शेडमध्ये घुसून तब्बल ५० हून अधिक कोंबड्यांचा फडशा पाडला. या अचानक झालेल्या हल्ल्यामुळे परिसरात मोठी खळबळ उडाली असून ग्रामस्थ प्रचंड भयभीत झाले आहेत.
आरडाओरड ऐकून बिबट्याची जंगलात धाव
स्थानिक महिला व्यावसायिक विद्या विनायक नाचरे यांचा गेल्या अनेक वर्षांपासून कुक्कुटपालनाचा व्यवसाय आहे. या व्यवसायातून मिळणाऱ्या उत्पन्नावरच त्यांच्या कुटुंबाचा उदरनिर्वाह चालतो. मंगळवारी पहाटेच्या सुमारास बिबट्याने त्यांच्या पोल्ट्री शेडमध्ये जाळी तोडून प्रवेश केला आणि कोंबड्यांवर जोरदार हल्ला चढवला.
शेडमधून कोंबड्यांचा मोठ्या प्रमाणावर आरडाओरड ऐकू आल्याने विद्या नाचरे यांनी तात्काळ शेडच्या दिशेने धाव घेतली. तेथे प्रत्यक्ष बिबट्या कोंबड्यांवर हल्ला करताना दिसून आला. नाचरे यांनी प्रसंगावधान राखून आरडाओरड केली असता बिबट्याने तेथून जवळच असलेल्या जंगलात धूम ठोकली.
हजारोंचे नुकसान; नुकसानभरपाईची मागणी
या हल्ल्यात ५० हून अधिक कोंबड्या ठार झाल्याने नाचरे यांचे हजारो रुपयांचे आर्थिक नुकसान झाले आहे. हातावर पोट असलेल्या या कुटुंबाला शासनाकडून आणि वनविभागाकडून तातडीने आर्थिक मदत व भरपाई मिळावी, अशी जोरदार मागणी ग्रामस्थांकडून केली जात आहे.
Devrukh Leopard Attack Poultry Farm: वनविभागाकडून परिसरात गस्त व देखरेख
ट्रॅप कॅमेरा लावण्यात आला
घटनेची माहिती मिळताच वनविभागाच्या पथकाने घटनास्थळी भेट देऊन पाहणी केली. बिबट्याच्या हालचालींवर बारकाईने लक्ष ठेवण्यासाठी परिसरात ट्रॅप कॅमेरा (Trap Camera) बसवण्यात आला आहे. दरम्यान, कॅमेरा लावल्यानंतर बिबट्या पुन्हा त्या परिसरात फिरकला नसल्याची माहिती वनविभागाच्या सूत्रांनी दिली आहे. तरीही खबरदारी म्हणून ग्रामस्थांनी रात्रीच्या वेळी सतर्क राहावे, असे आवाहन करण्यात आले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:49 20-08-2026
