मध्यस्थी करणाऱ्या मित्रांना व महिलांनाही बेदम मारहाण
दापोली: Kelshi Dapoli Assault Incident संदर्भात दापोली तालुक्यातील केळशी येथे पूर्ववैमनस्यातून झालेल्या जुन्या भांडणाच्या वादातून एका तरुणावर आणि त्याच्या कुटुंबीयांवर जीवघेणा हल्ला झाल्याची धक्कादायक घटना समोर आली आहे. याप्रकरणी दापोली पोलीस ठाण्यात आठ जणांविरोधात भारतीय न्याय संहितेच्या (BNS) विविध गंभीर कलमांसह महाराष्ट्र पोलीस कायद्यान्वये गुन्हा दाखल करण्यात आला आहे.
जुन्या वादातून केळशी मोहल्ल्यात बेदम मारहाण
२६ ऑगस्ट रोजी सायंकाळी ४:४० वाजताच्या सुमारास केळशी मोहल्ल्यातील जिल्हा परिषद उर्दू शाळेजवळ ही घटना घडली. फिर्यादी रिजवान दाऊद अलबा (वय ३२, रा. केळशी नबी मोहल्ला) आणि आरोपी क्रमांक १ रियाज अली बोरकर यांच्यात यापूर्वी काही कारणावरून वाद झाला होता. याच जुन्या वादाचा राग मनात धरून आठही आरोपींनी बेकायदेशीर जमाव जमवून फिर्यादी रिजवान अलबा यांना मारहाण करण्यास सुरुवात केली.
डोळ्यावर बुक्क्या मारून दिली जीवे मारण्याची धमकी
या हल्ल्यात आरोपी रियाज अली बोरकर याने फिर्यादीच्या डाव्या डोळ्यावर बुक्क्याने मारून दुखापत केली, तर इतर आरोपींनी मिळून त्यांना जमिनीवर पाडून लाथाबुक्क्यांनी बेदम मारहाण केली. “आज तुला संपवून टाकतो,” अशी धमकीही आरोपींनी या वेळी दिली.
दरम्यान, भांडण सोडवण्यासाठी आलेले फिर्यादीचे मित्र अबरार इस्माईल डायली, रियान इक्बाल चाऊस, नाजीम इक्बाल डायली, फिर्यादीची आई हमीदा दाऊद अलबा आणि मेहुणे मसूद शरीफ बोरकर हे मध्यस्थी करण्यासाठी मध्ये आले असता, आरोपींनी त्यांनाही लाथाबुक्क्यांनी मारहाण केली. या हल्ल्यात फिर्यादीचे मेहुणे मसूद शरीफ बोरकर यांच्या उजव्या गालावर दुखापत झाली आहे.
दापोली पोलीस ठाण्यात ८ जणांवर गुन्हा दाखल
याप्रकरणी रिजवान दाऊद अलबा यांनी दिलेल्या फिर्यादीवरून दापोली पोलीस ठाण्यात २७ ऑगस्ट रोजी मध्यरात्री २:३९ वाजता खालील ८ आरोपींवर गुन्हा दाखल करण्यात आला आहे:
दाखल कलमे: गुन्हा नोंद क्रमांक १७१/२०२६ नुसार भारतीय न्याय संहिता (BNS) कलम १८९(२), १९०, ११५(२), ३५१(२) तसेच महाराष्ट्र पोलीस अधिनियम १९५१ चे कलम ३७(१)(३)/१३५ अन्वये गुन्हा नोंदवण्यात आला असून दापोली पोलीस या प्रकरणाचा अधिक तपास करत आहेत.
आरोपींची नावे: रियाज अली बोरकर, कबीर इलियास चाऊस, अली इलियास चाऊस, समीउल्ला फराज चाऊस, इलियास अली चाऊस, फईम इलियास चाऊस, जमशीद इलियास चाऊस आणि वहीद आशिफ खमसे (सर्व रा. केळशी नबी मोहल्ला, ता. दापोली).
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:58 29-08-2026
