ज्येष्ठ नागरिक व महिलांचे हाल; पूर्ववत ओळखपत्रांवर सवलत देण्याची मागणी
चिपळूण:
NCMC Card Mandate आणि महाराष्ट्र राज्य मार्ग परिवहन महामंडळाने (एसटी) ज्येष्ठ नागरिक व महिला प्रवाशांना सवलतीचा लाभ घेण्यासाठी लागू केलेली ‘नॅशनल कॉमन मोबिलिटी कार्ड’ (एनसीएमसी) ची सक्ती तत्काळ रद्द करावी, अशी मागणी कोकणकन्या सोशल वेल्फेअर फाऊंडेशनने केली आहे. यासंदर्भात संस्थेच्या वतीने एसटी महामंडळाच्या व्यवस्थापकीय संचालकांना नुकतेच निवेदन सादर करण्यात आले आहे.
तांत्रिक अडचणी अन् लांबलचक रांगांमुळे ग्रामीण भागातील प्रवासी बेहाल
NCMC Card Mandate आणि प्रवाशांना भेडसावणाऱ्या अडचणी
शासनाने ज्येष्ठ नागरिक व महिलांसाठी विविध प्रवास सवलतीच्या योजना जाहीर केल्या आहेत; मात्र या सवलतींचा लाभ घेण्यासाठी एनसीएमसी कार्ड अनिवार्य केल्याने राज्यभरातील लाखो प्रवासी, महिला आणि विशेषतः ग्रामीण भागातील ज्येष्ठ नागरिकांना मानसिक व शारीरिक त्रास सहन करावा लागत असल्याचे निवेदनात नमूद करण्यात आले आहे.
कार्ड नोंदणी प्रक्रियेदरम्यान सर्व्हर डाऊन होणे, ओटीपी न मिळणे, कार्ड रिचार्ज करताना येणाऱ्या अडचणी, आधार लिंकिंगमधील त्रुटी तसेच नोंदणी केंद्रांवर लागणाऱ्या लांबलचक रांगांमुळे वयोवृद्ध नागरिकांचे हाल होत आहेत. ग्रामीण भागातील अनेक नागरिक डिजिटल प्रक्रियेशी परिचित नसल्याने ही प्रक्रिया अधिक कठीण ठरत आहे.
पर्यायी ओळखपत्रांवर सवलत देण्याची आणि तक्रार निवारण केंद्रांची मागणी
गणेशोत्सव व दिवाळीसारख्या सणासुदीच्या काळात हजारो नागरिक प्रवास करतात. मात्र नवीन कार्ड उपलब्ध नसल्याने अनेक प्रवाशांना पूर्ण तिकीट दराने प्रवास करावा लागत असून हा प्रवाशांवर अन्याय असल्याचे संस्थेने म्हटले आहे. एनसीएमसी कार्डची वितरण व्यवस्था पूर्णपणे सुरळीत होईपर्यंत या कार्डच्या सक्तीला स्थगिती द्यावी, अशी मागणी निवेदनात करण्यात आली आहे.
तसेच मतदान ओळखपत्र किंवा महामंडळाचे जुने सवलत कार्ड दाखवून पूर्वीप्रमाणेच प्रवाशांना सवलतीचा लाभ देण्यात यावा. एनसीएमसी कार्ड अनिवार्य करायचे असल्यास सुलभ नोंदणी व तक्रार निवारण केंद्रांची व्यवस्था करावी. याबाबत एसटी महामंडळाने तातडीने निर्णय घ्यावा, अशी मागणी कोकणकन्या सोशल वेल्फेअर फाऊंडेशनच्या संचालक ॲड. वृषाली सावंत, पूनम सावंत आणि ॲड. प्रियंका वाटेकर यांनी केली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:11 05-09-2026
