संशयित तरुणाविरुद्ध NDPS कायद्यानुसार गुन्हा दाखल; ५.५ ग्रॅम अमली पदार्थासह दुचाकी हस्तगत
रत्नागिरी शहरातील निवखोल येथे ब्राऊन हेरॉईन (अमली पदार्थ) विक्रीसाठी बाळगणाऱ्या एका तरुणावर रत्नागिरी शहर पोलिसांनी छापा टाकून धडक कारवाई केली आहे. या कारवाईत पोलिसांनी ब्राऊन हेरॉईनसदृश अमली पदार्थ आणि दुचाकी असा एकूण ९० हजार रुपये किमतीचा मुद्देमाल जप्त केला असून संशयित आरोपीविरुद्ध NDPS कायद्यान्वये गुन्हा दाखल केला आहे.
शाळेच्या बांधकामाच्या ठिकाणी पोलिसांचा छापा
ही कारवाई १० सप्टेंबर रोजी दुपारी ३:३० वाजेच्या सुमारास निवखोल ते कर्ला जाणाऱ्या रस्तनावरील रत्नागिरी नगरपरिषद शाळा क्रमांक १७ च्या बांधकामाच्या ठिकाणी करण्यात आली.
पोलिसांनी दिलेल्या माहितीनुसार, मुस्तकीम युसूफ मुल्ला (वय ३५, रा. घर क्र. २२५, राजीवडा, रत्नागिरी) हा दुचाकीवर बसलेला असताना पोलिसांना आढळून आला. त्याच्याकडे विक्रीच्या उद्देशाने ब्राऊन हेरॉईन बाळगल्याचा आरोप आहे. संशय आल्याने पोलिसांनी त्याची अंगझडती घेतली असता अमली पदार्थाचा साठा हस्तगत करण्यात आला.
९० हजारांचा मुद्देमाल जप्त
ब्राऊन हेरॉईन: ३५ हजार रुपये किमतीचे ५.५ ग्रॅम ब्राऊन हेरॉईन (निव्वळ ब्राऊन हेरॉईनचे वजन २.५ ग्रॅम) आणि पारदर्शक प्लास्टिकची पांढरी पिशवी जप्त करण्यात आली.
दुचाकी वाहन: अमली पदार्थ वाहतुकीसाठी वापरलेली ५५ हजार रुपये किमतीची हिरो कंपनीची मेस्ट्रो मॉडेलची पांढऱ्या रंगाची दुचाकी (MH 08 M 3212) जप्त केली.
अमली पदार्थ आणि दुचाकी मिळून जप्त करण्यात आलेल्या एकूण मुद्देमालाची किंमत ९० हजार रुपये आहे.
एनडीपीएस कायद्यानुसार गुन्हा नोंद
रत्नागिरी शहर परिसरात अमली पदार्थांच्या बेकायदेशीर विक्रीविरोधात पोलिसांनी कारवाई तीव्र केली आहे. जप्त केलेल्या अमली पदार्थाचा मुख्य स्रोत काय होता आणि त्याच्या विक्रीच्या जाळ्याबाबत पोलीस अधिक तपास करत आहेत. या प्रकरणी रत्नागिरी शहर पोलीस ठाण्यात NDPS कायदा १९८५ मधील कलम ८(क) आणि २१ अन्वये गुन्हा दाखल करण्यात आला असून पोलीस पुढील तपास करत आहेत.
