मुंबई-पुण्यातून हजारो वाहने रस्त्यावर; पेट्रोल, डिझेल आणि सीएनजी भरण्यासाठी वाहनचालकांची कसरत
रत्नागिरी : गणरायाच्या आगमनाची चाहूल लागताच मुंबई, पुण्यासह राज्याच्या विविध भागांतून कोकणात आपल्या गावी जाणाऱ्या गणेशभक्तांची संख्या प्रचंड वाढली आहे. गणेशोत्सवाच्या उत्साहात कोकणाकडे निघालेल्या चाकरमान्यांच्या वाहनांमुळे मुंबई-गोवा राष्ट्रीय महामार्ग (NH-66) अक्षरशः गजबजून गेला असून दिवस-रात्र वाहनांची अफाट वर्दळ पाहायला मिळत आहे. या वाढत्या गर्दीचा आणि वाहतुकीचा थेट ताण आता महामार्गालगतच्या पेट्रोल पंपांवर दिसून येत असून इंधन भरण्यासाठी वाहनांच्या लांबच लांब रांगा लागत आहेत.
मुंबई-गोवा महामार्गावर वाहनांचा महापूर
गणेशोत्सवासाठी मुंबई आणि पुणे परिसरातून लाखो चाकरमानी खाजगी चारचाकी, दुचाकी, ट्रॅव्हल्स आणि एसटी बसेसने कोकणाकडे रवाना झाले आहेत. महामार्गावर सतत वाहनांची रीघ लागल्याने अनेक संवेदनशील टप्प्यांवर वाहतुकीचा प्रचंड ताण जाणवत आहे. गणेशोत्सवाच्या दोन दिवस आधीच महामार्गावर सणाचे वातावरण तयार झाले असून रस्त्यांवर वाहनांची गर्दी पाहायला मिळत आहे.
पेट्रोल पंपांवर इंधनासाठी रांगा; सीएनजी पंपांवर वाहनांची गर्दी
प्रवाशांच्या वाहनांची संख्या अचानक वाढल्याने मुंबई-गोवा महामार्गावरील पेट्रोल पंपांवर पेट्रोल आणि डिझेल भरण्यासाठी गाड्यांच्या रांगा लागल्या आहेत. विशेषतः सीएनजी वाहनांची संख्या जास्त असल्याने सीएनजी पंपांवर वाहनचालकांना ताटकळत उभे राहावे लागत आहे. इंधनाचा तुटवडा भासू नये यासाठी पेट्रोल पंप चालकांकडूनही अतिरिक्त साठ्याची व्यवस्था केली जात आहे.
