शिंदे गटाचे वकील नीरज कौल आज पुन्हा मांडणार बाजू; ठाकरे गटाच्या दाव्यांवर प्रत्युत्तरात्मक युक्तिवाद
शिवसेना नाव अन् चिन्ह वाद प्रकरणी सर्वोच्च न्यायालयात (Supreme Court) आज पुन्हा एकदा महत्त्वाची सुनावणी पार पडणार आहे. मुख्यमंत्री एकनाथ शिंदे यांच्या नेतृत्वाखाली झालेल्या उठावानंतर शिवसेनेत मोठी फूट पडली होती. या फुटीनंतर पक्षाचे नाव ‘शिवसेना’ आणि मूळ चिन्ह ‘धनुष्यबाण’ कोणाचे, यावरून केंद्रीय निवडणूक आयोगासमोर वाद निर्माण झाला होता. निवडणूक आयोगाने पक्षाचे नाव आणि चिन्ह शिंदे गटाला देण्याचा निर्णय दिला होता. या निर्णयाला ठाकरे गटाच्या वतीने सर्वोच्च न्यायालयात आव्हान देण्यात आले असून, सध्या या याचिकेवर अंतिम सुनावणी सुरू आहे.
ठाकरे गटाच्या वतीने ज्येष्ठ वकील कपिल सिब्बल यांनी यापूर्वीच आपला सविस्तर युक्तिवाद पूर्ण केला आहे. ठाकरे गटाकडून न्यायालयात असा दावा करण्यात आला होता की, मूळ शिवसेना पक्ष एकच होता आणि केवळ विधीमंडळ पक्षातच फूट पडली होती.
शिंदे गटाचा प्रतिदावा: पक्षात थेट दोन गट निर्माण झाले
ठाकरे गटाच्या या दाव्याला प्रत्युत्तर देताना शिंदे गटाचे वकील वरिष्ठ अधिवक्ता नीरज कौल यांनी मंगळवारच्या सुनावणीदरम्यान जोरदार युक्तिवाद केला. "फक्त विधिमंडळ पक्षातच फूट पडली नव्हती, तर मूळ पक्षातच थेट दोन उभे गट निर्माण झाले होते," असा दावा कौल यांनी न्यायालयासमोर केला.
मंगळवारच्या सुनावणीनंतर आज बुधवारी पुन्हा एकदा या प्रकरणावर न्यायमूर्तींच्या पीठासमोर सुनावणी होणार आहे. आज शिंदे गटाचे वकील नीरज कौल आपला उर्वरित युक्तिवाद पुढे सुरु ठेवणार आहेत. सर्वोच्च न्यायालय या संवेदनशील विषयावर काय भूमिका घेते आणि आजच्या सुनावणीत काय घडामोडी घडतात, याकडे संपूर्ण महाराष्ट्राचे लक्ष लागले आहे.
