रायगडाचा कडा उतरणाऱ्या हिरकणीच्या चलचित्रातून दिला प्रबोधनात्मक संदेश; नगरसेवक सौरभ मलुष्टे यांनी दिली भेट
रत्नागिरी : कोकणातील गणेशोत्सवात बाप्पाच्या मूर्तीसमोर हलता देखावा अर्थात ‘चलचित्र’ (Moving Diorama) साकारण्याची अनेक वर्षांची समृद्ध परंपरा आहे. ग्रामीण भागात आजही ही लोककला आणि प्रबोधनाची परंपरा मोठ्या श्रद्धेने जपली जाते. या परंपरेचा सुरेख वारसा जपत तालुक्यातील सोमेश्वर येथील मयुर भितळे यांच्या घरी यंदा ‘हिरकणीच्या अथांग मातृत्वाचा आणि धैर्याचा’ विलोभनीय व जिवंत चलचित्र देखावा साकारण्यात आला आहे.
काळोख्या रात्री रायगडाचा कडा उतरणारी हिरकणी
आपल्या तान्हुल्या बाळाच्या ओढीने रायगडाचे दरवाजे बंद झाल्यानंतर अंधाऱ्या रात्री अवघड कडा उतरून जाणारी ‘माता हिरकणी’ या चलचित्राच्या माध्यमातून हुबेहूब जिवंत करण्यात आली आहे. हिरकणीकडे कोणतेही मोठे शस्त्र किंवा सामर्थ्य नव्हते, तिच्याकडे होती ती फक्त मातृत्वाची अफाट ताकद आणि मनातील दुर्दम्य जिद्द! अत्यंत कलात्मक व तांत्रिक कौशल्याने साकारलेला हा देखावा पाहण्यासाठी भाविक मोठी गर्दी करत असून देखाव्याला सर्वत्र मोठी पसंती मिळत आहे.
चलचित्रातून दिला जिद्द आणि संघर्षाचा प्रबोधनात्मक संदेश
“या भूमंडळाचे ठाई धर्मरक्ष ऐसा नाही, महाराष्ट्र धर्म राहिला काही तुम्हा कारणे…” या समर्थ रामदास स्वामींच्या ओळींचे स्मरण करून देत, परिस्थिती कितीही कठीण असली तरी मनात जिद्द असेल तर माणूस मर्यादा ओलांडून इतिहास घडवू शकतो, हा विचार या देखाव्यातून मांडण्यात आला आहे. बाप्पाच्या चरणी लीन होताना केवळ सुख न मागता संकटांना सामोरे जाण्याचे धैर्य, अपयशातून पुन्हा उभे राहण्याची ताकद आणि समाजासाठी जगण्याची प्रेरणा मागावी, असा अत्यंत मार्मिक व प्रबोधनात्मक संदेश या चलचित्रातून देण्यात आला आहे.
नगरसेवक सौरभ मलुष्टे यांची सदिच्छा भेट; अनंत चतुर्दशीपर्यंत पाहता येणार देखावा
या अप्रतिम कलाकृतीचे कौतुक करण्यासाठी रत्नागिरी नगरपरिषदेचे नगरसेवक सौरभ मलुष्टे यांनी सोमेश्वर येथे भेट देऊन चलचित्राची पाहणी केली व भितळे कुटुंबीयांचे कौतुक केले. हा मनमोहक देखावा गणेशभक्तांसाठी अनंत चतुर्दशीपर्यंत दर्शनासाठी खुला राहणार आहे.
