वकिलाच्या दुमजली घराचे कुलूप तोडून कपाटातील रोख रक्कम पळवली; खेड पोलिसांत तक्रार दाखल
खेड : गणेशोत्सवाच्या कालावधीत बंद घरांना लक्ष्य करणाऱ्या चोरट्यांनी खेड तालुक्यातील बोरघर रहाटवाडी येथे एका दुमजली घरावर डल्ला मारल्याची घटना समोर आली आहे. फिर्यादी घराबाहेर असताना अज्ञात चोरट्याने सेफ्टी दरवाजा आणि आतील मुख्य दरवाजाचे लॉक हत्याराने उचकटून कपाटातील रोख रक्कम चोरून नेली. या प्रकरणी खेड पोलीस ठाण्यात अज्ञात आरोपीविरोधात गुन्हा दाखल करण्यात आला आहे.
घर बंद असल्याचा फायदा घेऊन चोरी
गोरेगाव पश्चिम (मुंबई) येथील रहिवासी असलेले वकील सुधीर सीताराम पवार (वय ५०, सध्या मुक्काम खेड) यांचे बोरघर रहाटवाडी येथे दुमजली घर आहे. ११ सप्टेंबर रोजी रात्री ८ ते १४ सप्टेंबर रोजी सकाळी ९.३० या कालावधीत घर बंद होते. या संधीचा फायदा घेत अज्ञात चोरट्याने घराच्या मुख्य सेफ्टी डोअरचे आणि आतील दरवाजाचे लॉक धारदार हत्याराने तोडून घरात प्रवेश केला.
कपाटाचे लॉकर उचकटून ५ हजारांची रोकड लंपास
चोरट्याने घरातील कपाटाचे लॉकर उघडून त्यामध्ये ठेवलेली ५,००० रुपयांची रोख रक्कम चोरून नेली. फिर्यादी घरी आल्यानंतर हा चोरीचा प्रकार उघडकीस आला.
खेड पोलिसांत गुन्हा नोंद
सुधीर पवार यांनी दिलेल्या फिर्यादीवरून खेड पोलीस ठाण्यात अज्ञात चोरट्याविरुद्ध भारतीय न्याय संहिता (BNS) २०२३ च्या कलम ३३१(३), ३३१(४) आणि ३०५(अ) अन्वये घरफोडी व चोरीचा गुन्हा नोंदवण्यात आला असून, पोलीस या प्रकरणाचा पुढील तपास करत आहेत.
