मुरडव सुतारवाडी येथील ३६ वर्षीय सुहास केळकर यांचा उपचारादरम्यान मृत्यू; संगमेश्वर पोलिसांत नोंद
संगमेश्वर : गणेशोत्सवाच्या धामधुमीत संगमेश्वर तालुक्यातून एक अत्यंत हृदयद्रावक घटना समोर आली आहे. घरात गणपती बाप्पाच्या आगमनाची तयारी आणि मखराची सजावट करत असताना विजेचा जोरदार धक्का (शॉक) लागल्याने ३६ वर्षीय तरुणाचा दुर्दैवी मृत्यू झाला. सुहास विष्णू केळकर (वय ३६, रा. मुरडव, सुतारवाडी, ता. संगमेश्वर) असे मृत तरुणाचे नाव असून, या घटनेमुळे संपूर्ण गावावर आणि परिसरात तीव्र शोककळा पसरली आहे.
इलेक्ट्रिक तोरण लावताना घडली दुर्घटना
मिळालेल्या माहितीनुसार, १३ सप्टेंबर रोजी दुपारी संगमेश्वर तालुक्यातील मुरडव सुतारवाडी येथील राहत्या घरी सुहास केळकर हे गणपतीच्या सजावटीचे काम करत होते. मखरावर विजेचे आकर्षक तोरण (रोषणाई) लावत असताना त्यांना अचानक विजेचा जोरदार शॉक लागला. विजेच्या धक्क्याने ते जागीच बेशुद्ध पडले.
उपचारापूर्वीच डॉक्टरांनी घोषित केले मृत
घटनेनंतर कुटुंबीयांनी व परिसरातील नागरिकांनी त्यांना तातडीने उपचारासाठी चिपळूण तालुक्यातील वालावलकर रुग्णालय, डेरवण येथे दाखल केले. मात्र, रुग्णालयातील डॉक्टरांनी त्यांची तपासणी करून त्यांना उपचारापूर्वीच मयत घोषित केले. सणाच्या तोंडावर घरातील कर्त्या तरुणाचा अशा प्रकारे आकस्मिक मृत्यू झाल्याने केळकर कुटुंबीयांवर दुःखाचा डोंगर कोसळला आहे.
संगमेश्वर पोलिसांत आकस्मिक मृत्यूची नोंद
या घटनेची माहिती मिळताच संगमेश्वर पोलिसांनी रुग्णालयात धाव घेऊन पंचनामा केला. या प्रकरणी संगमेश्वर पोलीस ठाण्यात भारतीय नागरिक सुरक्षा संहिता (BNSS) कलम १९४ अन्वये आकस्मिक मृत्यू (आमृ. क्र. ३८/२०२६) अशी नोंद करण्यात आली असून, पोलीस अधिक तपास करत आहेत.
