मित्रांसोबत पोहण्यासाठी उतरला अन् ओहोटीच्या पाण्यात वाहून गेला; अथर्व देसाईचा मृतदेह सापडला
संगमेश्वर : मित्रांसोबत फिरण्यासाठी गेलेल्या एका २२ वर्षीय तरुणाचा शास्त्री नदीच्या खाडीतील खोल पाण्यात बुडून दुर्दैवी मृत्यू झाल्याची धक्कादायक घटना समोर आली आहे. संगमेश्वर तालुक्यातील मांजरे कलकंदेकॉंड जांभळीचे बंदर येथे ही दुर्घटना घडली. अथर्व राजेश देसाई (वय २२, रा. मांजरे कलकंदेकॉंड, ता. संगमेश्वर) असे मृत तरुणाचे नाव असून, या घटनेमुळे संपूर्ण गावावर शोककळा पसरली आहे.
ओहोटीच्या वेगवान प्रवाहामुळे तोल गेला
मिळालेल्या माहितीनुसार, अथर्व देसाई हा आपल्या मित्रांसह शास्त्री नदीच्या खाडीकिनारी बसला होता. दरम्यान, तो पोहण्याच्या उद्देशाने खाडीच्या पाण्यात उतरला. मात्र, त्यावेळी खाडीत ओहोटी सुरू असल्याने पाण्याचा प्रवाह अत्यंत वेगवान होता. या तीव्र प्रवाहामुळे पाण्याचा अंदाज न आल्याने त्याचा तोल गेला आणि तो खोल पाण्यात ओढला जाऊन बुडाला.
शोधमोहिमेनंतर सापडला मृतदेह
घटनेची माहिती मिळताच स्थानिक ग्रामस्थ आणि पोलिसांनी तातडीने खाडीच्या पात्रात शोधमोहीम हाती घेतली. अखेर १५ सप्टेंबर रोजी सायंकाळी साडेचार वाजण्याच्या सुमारास अथर्व याचा मृतदेह खाडीच्या पाण्यात मिळून आला. ऐन गणेशोत्सवाच्या धामधुमीत तरुण मुलाचा असा अचानक पाण्यात बुडून मृत्यू झाल्याने देसाई कुटुंबीयांवर मोठा आघात झाला आहे.
संगमेश्वर पोलिसांत आकस्मिक मृत्यूची नोंद
स्थानिकांच्या मदतीने मृतदेह पाण्याबाहेर काढून शवविच्छेदनासाठी पाठवण्यात आला. या प्रकरणी संगमेश्वर पोलीस ठाण्यात भारतीय नागरिक सुरक्षा संहिता (BNSS) कलम १९४ अन्वये आकस्मिक मृत्यू (आमृ. क्र. ३९/२०२६) अशी नोंद करण्यात आली असून, पोलीस पुढील तपास करत आहेत.
