मेहता पब्लिशिंग हाऊसकडून होणार दुसरे पुस्तक प्रकाशित; तुरुंगातील अनुभव आणि प्रेरणादायी किस्से पुस्तकात
मुंबई:
Sanjay Raut New Book च्या संदर्भात शिवसेना उद्धव बाळासाहेब ठाकरे पक्षाचे खासदार संजय राऊत यांनी मोठी घोषणा केली आहे. त्यांचे ‘बोध कीर्तन’ नावाचे नवे पुस्तक लवकरच वाचकांच्या भेटीला येणार आहे. संजय राऊत यांनी स्वतः सोशल मीडिया प्लॅटफॉर्म ‘एक्स’ (ट्विटर) वर पोस्ट करत या नव्या पुस्तकाचा कव्हर फोटो शेअर केला असून त्या संदर्भातील माहिती दिली आहे.
‘नरकातला स्वर्ग’ पुस्तकानंतर नवे लेखन
खासदार संजय राऊत यांचे ‘नरकातला स्वर्ग’ हे पुस्तक १७ मे २०२५ रोजी प्रकाशित झाले होते आणि त्यास वाचकांकडून मोठा प्रतिसाद मिळाला होता. या पुस्तकाच्या मराठी आवृत्तीचे प्रकाशन मुंबईत, तर इंग्रजी आवृत्तीचे प्रकाशन नवी दिल्लीत करण्यात आले होते. त्यामध्ये २०१४ मधील राजकीय घडामोडी, ईडीच्या कारवाया, तुरुंगातील प्रसंग आणि कुटुंबीयांची साथ यावर त्यांनी भाष्य केले होते.
आता ‘नरकातला स्वर्ग’च्या प्रचंड यशानंतर संजय राऊत यांचे ‘बोध कीर्तन’ हे नवे पुस्तक वाचकांसाठी सज्ज होत आहे.
तुरुंगातील आठवणी आणि प्रेरणादायी किस्से
मेहता पब्लिशिंग हाऊसतर्फे प्रकाशित होणारे हे संजय राऊत यांचे दुसरे पुस्तक असेल. "मेहता पब्लिशिंग हाऊसतर्फे लवकरच प्रकाशित होणाऱ्या माझ्या पुस्तकाची छोटीशी झलक! एक अनोखे पुस्तक!" अशा शब्दांत त्यांनी एक्सवर आनंद व्यक्त केला आहे.
‘बोध कीर्तन’ या पुस्तकात तुरुंगातील काही खास अनुभव, वाचकांना प्रेरित करणारे किस्से आणि इतर विविध घडामोडींचा समावेश असणार आहे. त्यामुळे राजकीय आणि साहित्यिक वर्तुळात या पुस्तकाच्या प्रकाशनाबाबत मोठी उत्सुकता निर्माण झाली आहे.
