समुद्रात घडलेल्या दुर्घटनेचे कागदपत्र वर्ग केल्यानंतर कारवाई
Ratnagiri Ship Accident प्रकरणात अरेबियन समुद्रातील ‘एमव्ही रेक एलिट’ या जहाजावर १० एप्रिल रोजी झालेल्या एका गंभीर दुर्घटनेत इजिप्तच्या ३५ वर्षीय अधिकाऱ्याचा मृत्यू झाल्याची बाब समोर आली आहे. इस्लाम आदेल अहमद अब्देल लतिफ असे मृत व्यक्तीचे नाव असून ते या जहाजावर ‘सेफ्टी ऑफिसर’ आणि ‘थर्ड ऑफिसर’ म्हणून कार्यरत होते. या दुर्घटनेप्रकरणी रत्नागिरी जिल्ह्यातील जयगड सागरी पोलीस ठाण्यात अकस्मात मृत्यूची नोंद करण्यात आली आहे.
अरेबियन समुद्रात घडली घटना; १६ एप्रिलला जहाज जयगड बंदरात
प्राप्त माहितीनुसार, १० एप्रिल रोजी दुपारी १.३० वाजताच्या सुमारास अरेबियन समुद्रात १४.१० उत्तर अक्षांश आणि ५५.२८ पूर्व रेखांश या स्थानाजवळ ही दुर्घटना घडली. दुर्घटनेनंतर ‘एमव्ही रेक एलिट’ हे जहाज १६ एप्रिल रोजी दुपारी १२.४५ वाजता रत्नागिरी तालुक्यातील जयगड येथील जेएसडब्ल्यू (JSW) बंदरात दाखल झाले. यानंतर वाटद-खंडाळा प्राथमिक आरोग्य केंद्रातील वैद्यकीय अधिकाऱ्यांकडून प्रशासनाला घटनेची माहिती मिळाली.
मुंबईकडून प्रकरण रत्नागिरी पोलिसांकडे वर्ग
सदर दुर्घटना घडलेले स्थान मुंबईतील यलो गेट पोलीस ठाण्याच्या हद्दीत येत नसल्याने, प्राथमिक कागदपत्रे आणि तपास रत्नागिरी पोलीस अधीक्षक कार्यालयाकडे वर्ग करण्यात आला. त्यानंतर पोलीस अधीक्षकांच्या आदेशानुसार प्रकरणाची पुढील चौकशी जयगड सागरी पोलिसांकडे सोपवण्यात आली.
जयगड सागरी पोलिसांकडून तपास सुरू
वरिष्ठ कार्यालयाकडून प्राप्त आदेश आणि कागदपत्रांच्या आधारे १७ सप्टेंबर रोजी सकाळी ११.२६ वाजता जयगड सागरी पोलीस ठाण्यात अकस्मात मृत्यूची अधिकृत नोंद करण्यात आली आहे. जयगड पोलीस या प्रकरणाचा पुढील तपास करत आहेत.
