अलोरे-नागावे येथील पालांडेवाडीतील घटना; तीन फूट लांबीच्या पिल्लाला मिळाले नैसर्गिक अधिवासात पुनर्वसन
Crocodile Rescue Chiplun मोहिमेअंतर्गत चिपळूण तालुक्यातील अलोरे-नागावे येथील पालांडेवाडी येथे एका पडीक पाण्याच्या टाकीत पडलेल्या मगरीच्या पिल्लाला वनविभागाच्या बचाव पथकाने सुखरूप बाहेर काढले आहे. सुमारे तीन फूट लांबीचे हे पिल्लू पूर्णपणे सुस्थितीत असून प्राथमिक तपासणीनंतर त्याला सुरक्षितपणे नैसर्गिक अधिवासात मुक्त करण्यात आले आहे.
पडीक टाकीत पडल्याने बाहेर पडणे झाले होते कठीण
१७ सप्टेंबर रोजी सुविनंद पालांडे यांच्या घरासमोरील पाणी नसलेल्या पडीक टाकीत मगरीचे पिल्लू पडल्याचे त्यांच्या निदर्शनास आले. ही टाकी सुमारे पाच ते सहा फूट खोल असल्याने पिल्लाला स्वतःहून बाहेर पडण्याचा कोणताही मार्ग नव्हता. पालांडे यांनी प्रसंगावधान राखून वनविभागाच्या टोल फ्री क्रमांकावर त्वरित संपर्क साधून घटनेची कल्पना दिली. त्यानंतर चिपळूण वनपरिक्षेत्र अधिकारी एस. एस. खान यांच्याशी संपर्क साधण्यात आला.
वनविभागाच्या बचाव पथकाची तत्परता
माहिती मिळताच वन्यप्राणी बचाव पथकातील वनरक्षक राहुल गुंठे आणि पथकाचे सदस्य अजय बडाडे यांनी तातडीने घटनास्थळी धाव घेतली. टाकीची पाहणी केल्यानंतर बचाव पथकाने विशेष खबरदारी घेत मगरीच्या पिल्लाला सुरक्षितपणे बाहेर काढले. त्यानंतर त्याला जेरबंद करून प्राथमिक तपासणी करण्यात आली.
नैसर्गिक अधिवासात सोडले
मगरीचे पिल्लू सुस्थितीत असल्याची खात्री पटल्यानंतर वरिष्ठांच्या आदेशानुसार त्याला पुन्हा नैसर्गिक अधिवासात मुक्त करण्यात आले. हे बचावकार्य विभागीय वन अधिकारी गिरिजा देसाई, सहाय्यक वनसंरक्षक प्रियंका लगड आणि वनपरिक्षेत्र अधिकारी एस. एस. खान यांच्या मार्गदर्शनाखाली पार पडले. यामध्ये वनरक्षक राहुल गुंठे व अजय बडाडे यांनी प्रत्यक्ष सहभाग घेतला.
