फलाटावर बस लावत असताना तोल गेल्याने घडला अपघात; जखमीला पुढील उपचारासाठी रत्नागिरीत हलवले, पोलिसांकडून चौकशी सुरू
साखरपा (रत्नागिरी):
साखरपा बसस्थानकात रविवारी (२० सप्टेंबर) दुपारी १२:४५ च्या सुमारास एसटी बस फलाटावर लावत असताना घडलेल्या दुर्घटनेत एक तरुण गंभीर जखमी झाला. कोल्हापूर डेपोची रत्नागिरी-कोल्हापूर ‘शिवाई’ बस (क्रमांक MH 12 ZE 8953) फलाटावर लावली जात असताना हा अपघात घडला. अपघाताची माहिती मिळताच स्थानिक पोलिसांनी घटनास्थळी धाव घेऊन जखमीला तातडीने रुग्णालयात दाखल केले.
तोल गेल्याने बसच्या चाकाचा बसला धक्का
मिळालेल्या माहितीनुसार, मोर्डे-लाडवाडी येथील रहिवासी संजय रामचंद्र मांडवकर (वय ३८) यांचा अचानक तोल गेल्याने ते फलाटावर येत असलेल्या बसच्या पुढील बाजूला आले. यावेळी चालक महेश चाचणे (रा. हुपरी) हे बस फलाटावर लावत असताना, बसच्या पुढील चाकाचा जोरदार धक्का लागल्याने संजय मांडवकर यांच्या पायाला गंभीर दुखापत झाली.
प्राथमिक उपचारानंतर रत्नागिरीत हलवले
घटना घडताच परिसरातील नागरिकांनी मदतकार्य सुरू केले. सहाय्यक पोलीस फौजदार शांताराम पंदेरे, महिला पोलीस हेड कॉन्स्टेबल पावसकर आणि त्यांच्या सहकाऱ्यांनी तातडीने घटनास्थळी पोहोचून परिस्थिती हाताळली. सामाजिक कार्यकर्ते महेंद्र मोरे यांच्या मदतीने जखमी संजय मांडवकर यांना तत्काळ साखरपा प्राथमिक आरोग्य केंद्रात दाखल करण्यात आले. मात्र, पायाची दुखापत गंभीर असल्याने तेथील प्राथमिक उपचारानंतर त्यांना पुढील उपचारासाठी तातडीने रत्नागिरी येथील रुग्णालयात हलविण्यात आले आहे.
अपघाताचे नेमके कारण शोधण्यासाठी पोलीस चौकशी सुरू
दरम्यान, ही दुर्घटना नेमकी कोणत्या कारणामुळे आणि कशी घडली, याबाबतची सविस्तर शहानिशा साखरपा पोलिसांकडून केली जात आहे. घटनेनंतर काही वेळ बसस्थानक परिसरात गोंधळाचे वातावरण निर्माण झाले होते, मात्र पोलिसांनी तातडीने हस्तक्षेप करत वाहतूक आणि प्रवाशांची वर्दळ पूर्ववत केली.
