मुंबईसाठी २५०० हून अधिक जादा बसेस वळवल्याने ग्रामीण फेऱ्या रद्द; विद्यार्थी, व्यापारी आणि नोकरदारांचे मोठे हाल
Ratnagiri Rural ST Bus Service Disrupted मुळे रत्नागिरी जिल्ह्यातील ग्रामीण भागातील प्रवाशांमध्ये प्रचंड संतापाची लाट पसरली आहे. गणेशोत्सवानंतर कोकणात आलेल्या चाकरमान्यांचा मुंबई, ठाणे आणि पुण्याकडे परतीचा प्रवास सुरू झाला आहे. या परतीच्या प्रवासासाठी एसटी महामंडळाने २५०० हून अधिक जादा बसेस मुंबईच्या दिशेने रवाना केल्या आहेत. मात्र, या चाकरमान्यांच्या वाहतुकीसाठी गाड्या वळवण्यात आल्याने जिल्ह्यातील ग्रामीण भागातील नियमित वाहतुकीला त्याचा मोठा फटका बसला आहे.
२७ सप्टेंबरपर्यंत बसेसचा तुटवडा राहणार असल्याने रत्नागिरी विभागाचे एसटी वेळापत्रक पूर्णपणे विस्कळीत झाले आहे. रत्नागिरी विभागातील ९ आगारांतून सकाळी ५ वाजल्यापासून प्रवाशांची गर्दी वाढते. मात्र, ग्रामीण भागातील लांजा, राजापूर, चिपळूण, देवरूख यांसारख्या विविध मार्गांवरील फेऱ्या रद्द करण्यात आल्या आहेत किंवा कमी करण्यात आल्या आहेत. परिणामी, नियमित प्रवास करणाऱ्या प्रवाशांना तासनतास एसटीची वाट पाहावी लागत आहे.
एखादी एसटी आल्यास त्यात १०० ते १२० प्रवाशांना अक्षरशः कोंबले जात असून उभ्याने प्रवास करावा लागत आहे. काही मार्गांवर दररोज धावणाऱ्या तीन बसेसऐवजी केवळ एकच बस उपलब्ध करून देण्यात आल्याने शाळा-कॉलेजचे विद्यार्थी, व्यापारी आणि नोकरदारांचे हाल होत आहेत.
खासगी वडाप आणि मिनीबसकडून लूट:
वेळेवर एसटी उपलब्ध नसल्याचा गैरफायदा खासगी वाहतूकदार घेत आहेत. रत्नागिरी शहरात ये-जा करण्यासाठी वडाप आणि मिनीबस चालक प्रवाशांकडून १०० ते १३० रुपयांपर्यंत भाडे उकळत आहेत, जे एसटीच्या मूळ तिकिटापेक्षा ३० ते ४० रुपयांनी जास्त आहे. अशा प्रकारे उघडपणे होत असलेल्या लुटीकडे आरटीओ (RTO) विभाग पूर्णपणे दुर्लक्ष करत असल्याचा आरोप स्थानिक नागरिक करत आहेत.
