दुष्काळ परिस्थितीवर चर्चा; स्वाधार आणि स्वयंम योजनेच्या भत्त्यात भरीव वाढ
Maharashtra Cabinet Decisions: मुख्यमंत्री देवेंद्र फडणवीस यांच्या नेतृत्वाखाली झालेल्या राज्य मंत्रिमंडळाच्या (कॅबिनेट) बैठकीत अनेक महत्त्वाचे निर्णय घेण्यात आले आहेत. या बैठकीत राज्यातील दुष्काळी परिस्थितीवर सविस्तर चर्चा करण्यात आली असून, राज्य कारभाराच्या दृष्टीने आणि विविध घटकांना दिलासा देणारे ७ मोठे निर्णय मंजूर करण्यात आले आहेत.
१. पोलीस दलासाठी “मुख्यमंत्री शौर्य पदक”
पोलीस दलातील अधिकारी व कर्मचाऱ्यांच्या साहसी आणि जोखीमयुक्त कामगिरीची दखल घेण्यासाठी “मुख्यमंत्री शौर्य पदक” देण्याचा ऐतिहासिक निर्णय घेण्यात आला आहे.
- स्वरूप: पदक, प्रशस्तीपत्र आणि ५० हजार रुपयांचा रोख पुरस्कार.
- निवड प्रक्रिया: त्रिस्तरीय समितीद्वारे १ जानेवारी २०२६ पासूनच्या कामगिरीची दखल घेतली जाईल.
- घोषणा व वितरण: दरवर्षी १ मे (महाराष्ट्र दिन) पूर्वसंध्येला घोषणा होईल आणि मुख्यमंत्र्यांच्या हस्ते पदके प्रदान केली जातील.
२. वडार समाजाला गौण खनिज रॉयल्टीत मोठा दिलासा
वडार समाजाच्या पारंपरिक दगडफोडी आणि उत्खननासाठीच्या गौण खनिज स्वामित्वधनात (रॉयल्टी) वाढीव सवलत देण्यात आली आहे. यासाठी महाराष्ट्र जमीन महसूल नियम १९६८ मध्ये सुधारणा करण्यास मंजुरी देण्यात आली आहे.
- उत्खनन मर्यादा: वार्षिक उत्खनन मर्यादा २०० ब्रासवरून थेट ५०० ब्रास करण्यात आली आहे.
३. उच्च शिक्षणासाठी ‘सी.एम. सृष्टी’ (CM SRISTHI) योजना
उच्च व तंत्रशिक्षण क्षेत्रात नाविन्यपूर्ण तंत्रज्ञान आणि संशोधनाला चालना देण्यासाठी ‘सी.एम. सृष्टी’ योजना राबविण्यास मंजुरी देण्यात आली आहे. राज्यातील सर्व सार्वजनिक विद्यापीठे, शासकीय तंत्रनिकेतने, ICT मुंबई, COEP पुणे आणि डॉ. बाबासाहेब आंबेडकर तंत्रशास्त्र विद्यापीठ (लोणेरे) यांच्यामार्फत ही योजना राबवली जाईल.
४. पोलीस कोठडीतील मृत्यूबाबत नुकसानभरपाई धोरण
पोलीस कोठडीत होणाऱ्या अनैसर्गिक मृत्यूप्रकरणी मृताच्या कायदेशीर वारसांना वेळेत आर्थिक मदत देण्यासाठी सर्वसमावेशक धोरण तयार करण्यास मंजुरी देण्यात आली आहे.
५. अनुदानित वसतिगृह कर्मचाऱ्यांच्या मानधनात वाढ
सामाजिक न्याय विभागाअंतर्गत स्वयंसेवी संस्थांद्वारे चालवल्या जाणाऱ्या सुमारे २,३८८ अनुदानित वसतिगृहांमधील अधीक्षक, स्वयंपाकी, मदतनीस आणि चौकीदारांच्या मानधनात भरीव वाढ करण्याचा निर्णय घेण्यात आला आहे.
६. डॉ. बाबासाहेब आंबेडकर स्वाधार योजनेच्या भत्त्यात वाढ
शासकीय वसतिगृहात प्रवेश न मिळालेल्या अनुसूचित जाती व नवबौद्ध प्रवर्गातील विद्यार्थ्यांना भोजन, निवास व शैक्षणिक खर्चासाठी स्वाधार योजनेअंतर्गत मिळणाऱ्या अनुदानात वाढ करण्यात आली आहे.
७. पंडित दीनदयाल उपाध्याय स्वयंम योजनेत सुधारणा
अनुसूचित जमातीच्या (ST) विद्यार्थ्यांसाठी राबवल्या जाणाऱ्या ‘पंडित दीनदयाल उपाध्याय स्वयंम योजने’तील निवास व भोजन भत्त्यांच्या रक्कमेत सुधारणा करण्यास कॅबिनेटने मंजुरी दिली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
03:54 06-10-2026
