मुख्यमंत्री देवेंद्र फडणवीस आणि परिवहनमंत्री प्रताप सरनाईक यांच्याकडे उच्चस्तरीय चौकशीची मागणी
Vijay Wadettiwar: राज्य मार्ग परिवहन महामंडळाच्या (एसटी) बसगाड्यांच्या देखभाल-दुरुस्तीसाठी आवश्यक असलेल्या सुट्या भागांची (स्पेयर पार्टस्) खरेदी बाजारभावापेक्षा तब्बल ३० टक्क्यांहून अधिक दराने केली जात असल्याचा खळबळजनक आरोप विधानसभेचे विरोधी पक्षनेते विजय वडेट्टीवार (Vijay Wadettiwar) यांनी केला आहे. या गंभीर प्रकरणाची तात्काळ सखोल चौकशी करून दोषींवर कठोर कायदेशीर कारवाई करण्यात यावी, अशी जोरदार मागणी त्यांनी मुख्यमंत्री देवरेद्र फडणवीस (Devendra Fadnavis) आणि परिवहनमंत्री प्रताप सरनाईक (Transport Minister Pratap Sarnaik) यांच्याकडे केली आहे.
*सुट्या भागांच्या खरेदीत आर्थिक लूट असल्याचा दावा
*काँग्रेस नेते विजय वडेट्टीवार यांनी मुख्यमंत्री आणि राज्याच्या परिवहनमंत्र्यांना पत्र लिहून एसटीच्या खरेदी प्रकरणावर अनेक गंभीर प्रश्न उपस्थित केले आहेत. महामंडळाच्या वरिष्ठ स्तरावर निविदा प्रक्रिया जाणीवपूर्वक रखडवून, स्थानिक आगार आणि मध्यवर्ती कार्यशाळांच्या पातळीवर अंदाधुंद पद्धतीने ही खरेदी सुरू असल्याचा आरोप त्यांनी पत्रात केला आहे.
गेल्या अनेक महिन्यांपासून सुट्या भागांची महत्त्वाची आणि नियमित खरेदी प्रक्रिया हेतुप्रस्पर थंड बस्त्यात ठेवण्यात आली आहे. कायदेशीर निविदा प्रक्रियेद्वारे स्पर्धात्मक व पारदर्शक दर निश्चित करण्याऐवजी, स्थानिक स्तरावर बाजारभावापेक्षा सुमारे ३० टक्के अधिक मोजून साहित्य खरेदी केले गेले असून याद्वारे एसटी महामंडळाची पद्धतशीर आर्थिक लूट केली जात असल्याचे वडेट्टीवार यांनी म्हटले आहे.
*आंदोलन दडपण्यासाठी पोलीस आणि गुंडांचा वापर – वडेट्टीवार
*या पत्रकार परिषदेत किंवा निवेदनात बोलताना त्यांनी राष्ट्रीय राजकारणातील मुद्द्यांवरही भाष्य केले. देशाचे संविधान वाचवण्यासाठी खासदार राहुल गांधी यांच्या नेतृत्वाखाली सुरू असलेल्या प्रयत्नांचा पुनरुच्चार करत ते म्हणाले की, मत चोरी करणाऱ्यांना धडा शिकवण्यासाठी विरोधक आता थेट सर्वोच्च न्यायालयात गेले आहेत. गेल्या काही दिवसांत १३ कोटी मतदारांची नावे कट केल्याप्रकरणी सुरू असलेले शांततापूर्ण आंदोलन दडपण्यासाठी पोलीस बळ आणि गुंडांचा वापर केला जात असल्याचा गंभीर आरोप त्यांनी केला. मात्र, अशा दडपशाहीमुळे हा देश कधीही झुकणार नाही, असे सांगत त्यांनी ‘चलो दिल्ली’ची हाक देत विरोधकांची आक्रमक भूमिका स्पष्ट केली आहे.
