कुणबी समाजात गैरसमज पसरावे म्हणून षड्यंत्र; मराठा आरक्षणासाठी लढा कायम असल्याचे प्रसिद्धीपत्रकाद्वारे स्पष्ट
खेड : Ramdas Kadam Statement Khed संदर्भात कुणबी समाजामध्ये आपली राजकीय व सामाजिक प्रतिमा मलीन करण्यासाठी काही घटकांकडून जाणीवपूर्वक प्रयत्न केले जात असल्याचा थेट आरोप शिवसेनेचे ज्येष्ठ नेते व माजी मंत्री रामदास कदम यांनी केला आहे. समाजात गैरसमज पसरवून दोन समाजांत दुही निर्माण करण्याचे मोठे षड्यंत्र रचले जात असल्याचे त्यांनी एका प्रसिद्धीपत्रकाद्वारे अधिकृतपणे स्पष्ट केले आहे.
मराठा आरक्षणासाठीचा लढा कायम असल्याचे स्पष्ट करत त्यांनी आपल्या प्रसिद्धीपत्रकातून विरोधकांवर जोरदार निशाणा साधला आहे.
५०० कोटींच्या आरोपांवर स्पष्ट केली भूमिका
मराठा आंदोलक मनोज जरांगे पाटील यांनी शिवसेनेचे मुख्य नेते व उपमुख्यमंत्री एकनाथ शिंदे यांच्यावर केलेल्या ५०० कोटी रुपयांच्या आरोपांच्या पार्श्वभूमीवर रामदास कदम यांनी आपली भूमिका ठामपणे मांडली आहे. प्रसिद्धीपत्रकात पुढे बोलताना ते म्हणाले की, खोट्या आरोपांच्या माध्यमातून समाजात विष पसरवून आपली राजकीय पोळी भाजण्याचा प्रयत्न करणाऱ्यांच्या हाताला काहीही लागणार नाही.
अशा प्रकारच्या कुटील आणि गैरसमज पसरवणाऱ्या कृत्यांना जनता आणि समाज कधीही बळी पडणार नाही, असा ठाम विश्वासही रामदास कदम यांनी या प्रसंगी व्यक्त केला आहे.
