सरदार वल्लभभाई पटेल यांना आदरांजली
रत्नागिरी:
Kendriya Vidyalaya Nachane Ratnagiri च्या प्रांगणात भारताचे लोहपुरुष सरदार वल्लभभाई पटेल यांच्या जयंतीनिमित्त ‘राष्ट्रीय एकता दिवस’ अत्यंत उत्साहात आणि प्रेरणादायी वातावरणात साजरा करण्यात आला. कार्यक्रमाची सुरुवात सरदार वल्लभभाई पटेल यांच्या प्रतिमेस मान्यवरांच्या हस्ते पुष्पहार अर्पण करून आणि आदरांजली वाहून करण्यात आली.
या विशेष कार्यक्रमादरम्यान विद्यालयातील विद्यार्थ्यांनी राष्ट्रीय एकता दिवसाचे महत्त्व, सरदार वल्लभभाई पटेल यांचे प्रेरणादायी जीवनकार्य, स्वातंत्र्यलढ्यातील त्यांचे अमूल्य योगदान तसेच शेकडो संस्थानांच्या विलीनीकरणाद्वारे भारताच्या एकीकरणासाठी त्यांनी बजावलेली ऐतिहासिक भूमिका यावर भाषेच्या माध्यमातून आपले विचार मांडले. विद्यार्थ्यांनी मांडलेल्या विचारांमुळे संपूर्ण कार्यक्रमात देशभक्तीचे वातावरण निर्माण झाले होते.
विद्यालयाचे प्राचार्य श्री. अरुण कुमार यांनी उपस्थितांना संबोधित करताना सरदार वल्लभभाई पटेल यांच्या कर्तृत्वाचा गौरव केला. त्यांनी विद्यार्थ्यांना देशाची एकता, अखंडता आणि सार्वभौमत्व सर्वतोपरी जपण्याचे महत्त्व समजावून सांगितले. तसेच भाषा, धर्म, जात आणि प्रांत यांतील सर्व प्रकारची विविधता असूनही आपण सर्व प्रथम भारतीय आहोत, ही भावना प्रत्येकाने आपल्या मनात घट्ट रुजवली पाहिजे, असे आवाहन त्यांनी यावेळी केले.
कार्यक्रमात पुढे बोलताना प्राचार्य श्री. अरुण कुमार यांनी विद्यार्थ्यांना राष्ट्रीय एकात्मता, परस्पर सहकार्य, बंधुभाव, सामाजिक सलोखा आणि देशाप्रती आपली कर्तव्यभावना नेहमी जोपासण्याचा संदेश दिला. भारताच्या उज्ज्वल प्रगतीसाठी एकता आणि सामूहिक प्रयत्न किती अत्यंत महत्त्वाचे आहेत, यावरही त्यांनी सविस्तर प्रकाश टाकला. राष्ट्रीय एकता ही केवळ एका दिवसापुरती मर्यादित न राहता ती आपल्या दैनंदिन जीवनातील आचरणाचा आणि संस्काराचा भाग बनली पाहिजे, हा मोलाचा संदेश यातून देण्यात आला.
या प्रेरणादायी कार्यक्रमास विद्यालयाचे मुख्याध्यापक श्री. दत्तात्रय पवार यांच्यासह विद्यालयातील सर्व शिक्षक, शिक्षकेतर कर्मचारी आणि मोठ्या संख्याने विद्यार्थी उपस्थित होते. सर्वांच्या उत्स्फूर्त सहभागामुळे हा राष्ट्रीय एकता दिवसाचा कार्यक्रम अतिशय यशस्वी आणि संस्मरणीय वातावरणात संपन्न झाला. ‘एकता हीच भारताची शक्ती आणि विविधतेत एकता हीच भारताची खरी ओळख आहे,’ हा संदेश देत कार्यक्रमाची सांगता झाली.
