निधीअभावी राज्यातील अनेक केंद्रे बंद पडत असताना लांजात सेवा पूर्ववत; टेक्निशियन आणि कर्मचाऱ्यांनी बुधवारपासून सुरू केले काम
Lanja Dialysis Center Restart: आर्थिक अडचणी आणि निधीअभावी राज्यातील अनेक डायलिसिस केंद्रे बंद पडत असताना, रत्नागिरी जिल्ह्यातील लांजा ग्रामीण रुग्णालयातील डायलिसिस केंद्र बुधवारपासून पुन्हा थाटात सुरू करण्यात आले आहे. आमदार किरण सामंत यांनी डायलिसिस सेवा कोणत्याही परिस्थितीत बंद पडू देणार नसल्याची अत्यंत आक्रमक भूमिका घेत तातडीने पुढाकार घेतल्यामुळे लांजा परिसरातील किडनीच्या रुग्णांना मोठा दिलासा मिळाला आहे.
लांजा ग्रामीण रुग्णालयात रुग्णांच्या उपचारांच्या सोयीसाठी १७ फेब्रुवारी रोजी डायलिसिस केंद्र सुरू करण्यात आले होते. या केंद्रात ५ बेडची सुविधा उपलब्ध असल्यामुळे लांजा तालुक्यातील रुग्णांना स्थानिक पातळीवरच उत्तम उपचार मिळण्याची सोय झाली होती. याआधी उपचारासाठी रुग्णांना नजीकच्या रत्नागिरी शहरात जावे लागत असे. मात्र, अलीकडे आर्थिक कारणांमुळे हे केंद्र बंद पडण्याची शक्यता निर्माण झाल्याने रुग्णांसमोर पुन्हा लांबचा प्रवास करण्याचे संकट उभे ठाकले होते.
या गंभीर प्रश्नाची दखल घेत आमदार किरण सामंत यांनी डायलिसिस सेवा कोणत्याही परिस्थितीत बंद होऊ देणार नसल्याचे स्पष्ट केले होते. केंद्र बंद करण्याचा प्रयत्न झाल्यास स्वतः पुढाकार घेऊन ते सुरू ठेवू आणि प्रसंगी टेक्निशियनचा पगारही स्वतःच्या खिशातून देऊ, अशी ठाम ग्वाही त्यांनी दिली होती. तसेच रुग्णांना उपचारांपासून वंचित ठेवणाऱ्या संबंधित एजन्सीलाही त्यांनी सज्जड इशारा दिला होता. त्यांच्या या आश्वासक आणि आक्रमक भूमिकेमुळे लांजा येथील सेवा पूर्ववत होण्याचा मार्ग मोकळा झाला.

राज्यातील डायलिसिस केंद्रांचे संचालन ‘एचएलएल’ (HLL) या संस्थेमार्फत केले जाते आणि या केंद्रांना राष्ट्रीय आरोग्य अभियानाकडून (NHM) निधी पुरवला जातो. मात्र, मागील दोन वर्षांपासून निधी रखडल्याने राज्यातील अनेक केंद्रांच्या सेवेवर परिणाम झाला आहे. थकीत निधी मिळावा म्हणून एचएलएल संस्थेने एनएचएमला ३१ ऑक्टोबरपर्यंत अंतिम मुदत दिली होती. परंतु, निधीचे भुगतान न झाल्याने ११ नोव्हेंबरपासून राज्यातील अनेक केंद्रे बंद पडण्याच्या मार्गावर होती.
या पार्श्वभूमीवर आमदार किरण सामंत यांच्या पुढाकारामुळे लांजा येथील केंद्र सुरू राहिले. त्यांच्या या प्रयत्नांना प्रतिसाद देत डायलिसिस केंद्राचे टेक्निशियन मनोज कांबळे, हृतिक शिवगण, मनस्वी गुरव आणि निलेश सुवारे आदी कर्मचाऱ्यांनी बुधवारी नियमित काम सुरू केले. या कर्मचाऱ्यांची शिवसेनेचे तालुकाप्रमुख गुरुप्रसाद देसाई, नंदराज कुरूप, बाबा भिंगार्डे आणि सचिन भिंगार्डे यांनी भेट घेऊन पुष्पगुच्छ देऊन त्यांचे स्वागत केले तसेच केंद्राची पाहणी केली. डायलिसिस हा अत्यंत नियमित स्वरूपाचा उपचार असल्याने, राज्यातील इतर भागांत केंद्रे बंद असताना लांजात सेवा सुरू राहिल्याने रुग्णांना रत्नागिरीला जाण्याची पायपीट करावी लागली नाही, ज्याबद्दल सर्वत्र समाधान व्यक्त होत आहे.













