१९ वर्षांखालील आशिया कप २०२६ च्या विजेतेपदासाठी पारंपरिक प्रतिस्पर्धी आमनेसामने; अफगाणिस्तानचा पराभव करत भारताची दिमाखात अंतिम फेरीत मजल
नवी दिल्ली: १९ वर्षांखालील आशिया कप २०२६ (India vs Pakistan U19 Asia Cup 2026 Final) स्पर्धेचा अंतिम सामना भारत आणि पाकिस्तान यांच्यात रंगणार आहे. उपांत्य फेरीच्या सामन्यात भारतीय संघाने अफगाणिस्तानचा ८ विकेट्सने दणदणीत पराभव करत दिमाखात अंतिम फेरीत प्रवेश केला आहे. दुसरीकडे, पाकिस्तानने बांगलादेशचा पराभव करत फायनलचे तिकीट मिळवले आहे. त्यामुळे आता क्रिकेटविश्वातील या दोन पारंपरिक प्रतिस्पर्ध्यांमध्ये विजेतेपदासाठी महामुकाबला पाहायला मिळणार आहे.
गेल्या वर्षी म्हणजेच २०२५ च्या अंतिम सामन्यात आयुष म्हात्रेच्या नेतृत्वाखाली खेळणाऱ्या भारतीय संघाला पाकिस्तानकडून १९१ धावांनी पराभव स्वीकारावा लागला होता. आता त्या पराभवाचा बदला घेऊन आठवे विजेतेपद पटकावण्याचे मोठे आव्हान युवा भारतीय संघासमोर असणार आहे.
कर्णधार लक्ष्य रायचंदानी काय म्हणाला?
अफगाणिस्तानविरुद्धच्या विजयानंतर बोलताना भारतीय संघाचा कर्णधार लक्ष्य रायचंदानी या अंतिम सामन्यासाठी प्रचंड उत्सुक असल्याचे दिसून आला. तो म्हणाला, "हा एक अत्यंत शानदार अंतिम सामना होणार आहे. प्रत्येकजण या महामुकाबल्याची आतुरतेने वाट पाहत आहे. आम्हाला पूर्ण आशा आहे की, आम्ही मैदानावर आपली सर्वोत्तम कामगिरी करू."
शतकापासून अवघ्या ७ धावा दूर राहिल्याबद्दल बोलताना लक्ष्य म्हणाला, "शतक हुकल्याने मी नक्कीच निराश झालो होतो, परंतु संघाने विजय मिळवला आणि माझ्यासाठी तेच सर्वात महत्त्वाचे आहे. मी फक्त माझा नैसर्गिक खेळ खेळण्याचा आणि परिस्थितीनुसार फलंदाजी करण्याचा प्रयत्न केला, ज्यामध्ये मला यश आले." याशिवाय त्याने मधल्या षटकांत शिस्तबद्ध गोलंदाजी करणाऱ्या आपल्या गोलंदाजांचेही भरभरून कौतुक केले.
उपांत्य फेरीत भारताचे दणदणीत प्रदर्शन
उपांत्य फेरीच्या सामन्यात अफगाणिस्तानने भारतासमोर विजयासाठी २२८ धावांचे लक्ष्य ठेवली होते. प्रत्युत्तरादाखल खेळताना भारतीय फलंदाजांनी आक्रमक फलंदाजी करत अवघ्या ३६.५ षटकांत हे लक्ष्य सहज पार केले.
लक्ष्य रायचंदानी: ९० चेंडूंमध्ये १३ चौकार आणि १ षटकाराच्या मदतीने ९३ धावांची शानदार खेळी (शतक ७ धावांनी हुकले).
आर्यवीर सेहवाग: ५१ धावांचे महत्त्वपूर्ण योगदान (युएईविरुद्ध १६० धावांची खेळी केली होती).
व्ही. के. विनीत: ५७ धावांवर नाबाद राहत संघाच्या विजयावर शिक्कामोर्तब केले.
भारताला आठव्यांदा विजेतेपद पटकावण्याची संधी
१९ वर्षांखालील आशिया कपच्या इतिहासात भारतीय संघ सर्वात यशस्वी ठरला असून भारताने आतापर्यंत विक्रमी सात वेळा या स्पर्धेचे विजेतेपद पटकावले आहे. पाकिस्तान आणि बांगलादेशने प्रत्येकी दोन वेळा चषकावर नाव कोरले आहे. विशेष म्हणजे, २०२४ मध्ये बांगलादेश आणि २०२५ मध्ये पाकिस्तानकडून भारताला अंतिम फेरीत पराभवाचा सामना करावा लागला होता. त्यामुळे यंदा गतपराभवाचे शुक्लचक्र भेदून विजेतेपद उंचावण्याची सुवर्णसंधी टीम इंडियाकडे आहे.
