Ratnagiri News: दारूच्या नशेत विषारी औषध प्राशन केलेल्या करबुडेतील प्रौढाचा उपचारादरम्यान मृत्यू

Ratnagiri News: दारूच्या नशेत विषारी औषध प्राशन केलेल्या करबुडेतील प्रौढाचा उपचारादरम्यान मृत्यू

रत्नागिरी ग्रामीण पोलीस ठाण्यात आकस्मिक मृत्यूची नोंद

रत्नागिरी: रत्नागिरी तालुक्यातील करबुडे येथील एका ५५ वर्षीय प्रौढाचा दारूच्या नशेत विषारी औषध प्राशन केल्यानंतर कोल्हापूर येथील रुग्णालयात उपचारादरम्यान मृत्यू झाला आहे. विजय कृष्णा मोहिते (वय ५५, रा. करबुडे, ता. जि. रत्नागिरी) असे मृत्यू झालेल्या व्यक्तीचे नाव असून, या प्रकरणी सोमवारी, १६ नोव्हेंबर रोजी रत्नागिरी ग्रामीण पोलीस ठाण्यात आकस्मिक मृत्यूची नोंद करण्यात आली आहे.

पोलिसांनी दिलेल्या माहितीनुसार, विजय कृष्णा मोहिते यांनी ३१ ऑक्टोबर रोजी आपल्या राहत्या घरासमोर दारूच्या नशेत विषारी औषध सेवन केले होते. हा प्रकार लक्षात येताच कुटुंबीयांनी त्यांना तातडीने प्रथमोपचारासाठी रत्नागिरी जिल्हा शासकीय रुग्णालयात दाखल केले. मात्र, त्यांची प्रकृती अधिकच चिंताजनक झाल्याने त्याच दिवशी त्यांना पुढील उपचारासाठी कोल्हापूर येथील सीपीआर (CPR) रुग्णालयात हलवण्यात आले होते.

कोल्हापुरात उपचारादरम्यान प्राणज्योत मालवली
कोल्हापूर येथील सीपीआर रुग्णालयात त्यांच्यावर उपचार सुरू असताना ५ नोव्हेंबर रोजी पहाटे १ वाजण्याच्या सुमारास वैद्यकीय अधिकाऱ्यांनी त्यांना मृत घोषित केले. या घटनेची माहिती डॉ. कुणाल भांडुरे यांनी दिलेल्या वैद्यकीय-कायदेशीर अहवालाद्वारे (एमएलसी) प्रशासनाला कळवण्यात आली.

Yash siddhi

या अहवालानुसार १६ नोव्हेंबर रोजी सायंकाळी ४ वाजून २२ मिनिटांनी रत्नागिरी ग्रामीण पोलीस ठाण्यात भारतीय नागरिक सुरक्षा संहिता कलम १९४ प्रमाणे आकस्मिक मृत्यू क्रमांक १०६/२०२६ अन्वये नोंद करण्यात आली आहे. या घटनेमागील नेमके कारण काय, याचा अधिक तपास रत्नागिरी ग्रामीण पोलीस करत आहेत.