शनिवार, २१ नोव्हेंबर रोजी भरणार जत्रा; पाऱ्याची आळी ते आठवडा बाजार व वणजू आळी रस्ते फेरीवाल्यांसाठी बंद, गर्दीत फटाके स्टॉलला मज्जाव
रत्नागिरी : रत्नागिरी शहरातील मुख्य बाजारपेठेत शनिवार, दिनांक २१ नोव्हेंबर २०२६ रोजी कार्तिकी एकादशीनिमित्त भरणारी पारंपरिक जत्रा शांततेत, सुरक्षित आणि सुरळीत पार पडावी, या उद्देशाने आज पोलीस प्रशासन, नगरपालिका आणि व्यापारी महासंघ यांच्यात एक महत्त्वपूर्ण संयुक्त बैठक पार पडली. शहरातील श्री राधाकृष्ण मंदिरात आयोजित या बैठकीत गर्दीचे नियोजन, आपत्कालीन मार्ग मोकळे ठेवणे आणि सुरक्षेच्या दृष्टीने अनेक महत्त्वाचे निर्णय घेण्यात आले.
आपत्कालीन मार्ग मोकळे ठेवण्याचे पोलीस निरीक्षकांचे स्पष्ट आदेश :
कार्तिकी एकादशीच्या जत्रेनिमित्त शहराच्या मुख्य बाजारपेठेतील राम आळी, विठ्ठल मंदिर आणि धनजी नाका परिसरात भाविक व नागरिकांची प्रचंड गर्दी असते. तसेच परजिल्ह्यातूनही मोठ्या संख्येने विक्रेते या जत्रेसाठी रत्नागिरीत येतात. या पार्श्वभूमीवर शहर पोलीस निरीक्षक विवेक पाटील यांनी सुरक्षेच्या दृष्टीने कडक सूचना दिल्या:

फेरीवाल्यांना बंदी असलेले मार्ग : आपत्कालीन परिस्थितीत नागरिकांना बाहेर पडण्यासाठी रस्ते मोकळे राहावेत, यासाठी मारुती आळी येथील पाऱ्याची आळी ते आठवडा बाजार या रस्त्यावर तसेच वणजू आळीतील रस्त्यावर कोणत्याही फेरीवाल्याला दुकान लावता येणार नाही.
फटाक्यांच्या स्टॉलला मज्जाव : बाजारपेठेत गर्दीच्या ठिकाणी सुरक्षेच्या कारणास्तव फटाक्यांचा कोणताही स्टॉल लावता येणार नाही.
संशयास्पद हालचालींवर नजर : जत्रेच्या गर्दीत कोणतीही संशयास्पद व्यक्ती फिरताना दिसल्यास नागरिक व व्यापाऱ्यांनी तात्काळ पोलिसांना कळवावे, असे आवाहन करण्यात आले आहे.
आपत्कालीन यंत्रणा, वैद्यकीय पथक आणि स्वच्छतेचे नियोजन :
जत्रेदरम्यान कोणतीही अनुचित घटना घडू नये किंवा आपत्कालीन परिस्थिती उद्भवल्यास तात्काळ नियंत्रण ठेवता यावे, यासाठी प्रशासनाकडून विशेष उपाययोजना केल्या जाणार आहेत. यामध्ये महिला पोलीस बंदोबस्त, तातडीच्या प्रथमोपचारासाठी डॉक्टरांचे सज्ज पथक, दिशादर्शक फलक, आगीचे बंब आणि आपत्कालीन सूचना देण्यासाठी स्पीकर यंत्रणा कार्यान्वित केली जाणार आहे. तसेच, गर्दीच्या नियोजनासाठी नगरपालिकेची स्वतंत्र पथके स्थापन केली जाणार असून, जत्रा संपल्यानंतर होणाऱ्या कचऱ्याची योग्य विल्हेवाट लावण्यासाठी कचरा व्यवस्थापनाच्या सूचना नगरपालिकेला देण्यात आल्या आहेत.
पदाधिकारी व अधिकाऱ्यांची प्रमुख उपस्थिती :
या बैठकीला शहर पोलीस निरीक्षक विवेक पाटील, वाहतूक शाखेचे सहाय्यक पोलीस निरीक्षक युवराज म्हसकर, पोलीस उपनिरीक्षक संजय कांबळे, नगर परिषद अभियंता यतिराज जाधव, रत्नागिरी शहर व्यापारी महासंघाचे अध्यक्ष गणेश भिंगार्डे यांच्यासह व्यापारी महासंघाचे पदाधिकारी आणि स्थानिक व्यापारी मोठ्या संख्येने उपस्थित होते. यावेळी व्यापाऱ्यांनीही गर्दीच्या अनुषंगाने कोणते मार्ग सुरू ठेवावेत व सुरक्षेबाबत विविध महत्त्वपूर्ण सूचना मांडल्या.













